ألبته دييه‌بيليرز كه؛ حضرتِ إمامِ على (رض) ناصلكه باشده

بَدَئْتُ بِبِسْمِ اﷲِ رُوحِى بِهِ اهْتَدَتْ ❊ اِلٰى كَشْفِ اَسْرَارٍ بِبَاطِنِهِ انْطَوَتْ

يعنى ”خزينۀِ أسرار اولان بسم اﷲ الرحمن الرحيم ايله باشلادم. روحم، اونڭ ايله او خزينه‌يى كشف ايتدى.“ دييه‌رك سائر إشاراتڭ قرينه‌سيله بر معناىِ إشارى و بر مدلولِ مجازى صورتنده رسالۀِ النورڭ بسم اللّٰهى حكمنده و فاتحه‌سى و بسمله‌سى و ”بسم اﷲ“ده‌كى بيوك سرّڭ حقيقتنى بيان ايدن و قيصه و غايت قوّتلى برنجى سوز نامنده اولان بسم اﷲ رساله‌سنه ايما، بلكه رمز، بلكه إشارت ايدييور. عينًا اويله ده؛ سائر إشاراتڭ قرينه و مناسبتيله و حروفِ قرآنيه‌نڭ أسرارندن بحث ايدن و رموزاتِ ثمانيه نامنده بولونان سكز كوچك رساله‌لرڭ ماهيتلرينى آڭديرر بر طرزده، عباره‌يى دگيشديره‌رك حروفلرڭ أسراريله إستمداد ايتمگه باشلاماسى قرينۀِ لطيفه‌سيله معظّم دعا و مناجات و جامع قَسَمِ إستمدادينڭ آخرلرنده و سوزلره و مكتوبلره إشارتدن صوڭره {بِوَاحِ الْوَحَا بِالْفَتْحِ وَالنَّصْرِ اَسْرَعَتْ} فقره‌سيله يگرمى طوقوزنجى مكتوبڭ بر قسم أسرارِ حروفِ قرآنيه‌يى بيان ايدن رموزاتِ ثمانيه نامنده سكز كوچك رساله‌لرڭ أڭ مهملرى و فتحِ مكّه و فتحِ شام و فتحِ قُدُسْ و فتحِ إستانبول گبى چوق فتوحاتِ إسلاميه‌دن غيبى خبر ويرن سورۀِ {اِذَا جَاءَ نَصْرُ اﷲِ وَ الْفَتْحُ} نڭ أسرارينى بيان ايله، فتوحاتِ إسلاميه‌نڭ پهلوانى اولان حضرتِ إمامِ على‌نڭ (رض) نظرِ دقّتنى جلب ايدن فتح و نصر رساله‌سنه، هم سورۀِ فتحڭ أڭ مهمّ و أڭ آخر آيتڭ بش وجه ايله إعجازينى بيان و إثبات ايله، قهرمانِ إسلام حضرتِ إمامِ على‌نڭ (رض) نظرِ دقّتنى جلب ايدن غايت قيمتلى اولان آيتِ فتح رساله‌سى نامنده‌كى كوچك بر رساله‌يه ايما بلكه إشارت ايدر، إعتقادنده‌يم. بويله إعتقاده إشتراك ايديلمزسه ده إعتراض ايديلمه‌ملى