عزيز، صدّيق قارداشلرم!

بزه قارشى بو گنيش و أهمّيتلى هجوم و تجاوزڭ حقيقى سببى بشنجى شعاع اولماديغنى، بلكه حزب النورى و مفتاح الايمان حجّة البالغه اولديغنى بو فجرده بر إخطارِ معنوى ايله حسّ ايتدم. دقّتله حزبِ النورى‌يى قسمًا اوقودم، مفتاحى ده دوشوندم، بيلدم كه: زنديقلر، كفرِ مطلق مسلگنى بو ايكى كسكين ألماس قلنجلرڭ ضربه‌لرينه قارشى محافظه ايده‌مدكلرندن، بر پارچه آز سياستله مناسبتى بولونان بشنجى شعاعى ظاهرى بر سبب گوسترديلر، حكومتى إغفال ايدوب عليهمزه سَوق ايتديلر. عينًا بو إخطار ايله برابر خاطره گلدى كه: ”بر قسم ضعيف قارداشلريمز موقّةً واز گچسه‌لر، بلكه كنديلرى بو بلادن قورتاريلير.“ دييه إذن ويرمك ايستدم. بردن إخطار ايديلدى كه: بو درجه علاقه‌سى دوام ايدن و ايكى دفعه بو إمتحانه گيرن و مقابلنده بو قدر زحمت چكدكدن صوڭره فائده‌سز، ضررلى قلبًا واز گچمك دگل، بلكه يالڭز اونلرى آلداتمق ايچون صِرف ظاهرى بر إجتناب گوستره‌بيلير. يوقسه هم كندينه، هم بزلره، هم قدسى مسلگمزه ضررى طوقونور، جزاسى اولارق عكسى مقصديله طوقات ير