و كذا أسماءِ حسنى‌دن ”وارث“ إسمنڭ تجلّياتى عددنجه و بابالر گبى اصولڭ زوالندن صوڭره باقى قالان فروعاتڭ صاييسنجه و عالمِ آخرتڭ موجوداتى عددنجه و اُخروى مكافاتلرى آلمغه مدار اولمق اوزره حفظ ايديلن بشرڭ عمللرى صاييسنجه، صداسيله شو فضايى طولديره‌جق قدر بيوك بر الحمد ِﷲ ايله حمد ايديله‌جك حفيظيت نعمتيدر. چونكه نعمتڭ دوامى، نعمتڭ ذاتندن داها قيمتليدر. لذّتڭ بقاسى، لذّتدن داها لذيذدر. جنّتده دوام، جنّتڭ فوقنده‌در و هكذا... بناءً عليه جنابِ حقّڭ حفيظيتى تضمّن ايتديگى نعمتلر، بتون كائناتده موجود بتون نعمتلردن داها چوق و داها اوستنده‌در. بو إعتبارله آغيز طولوسى ايله بر الحمد ِﷲ ايستر

شو ذكر ايديلن درت إسمه باقى قالان أسماءِ حسنى‌يى قياس ايت كه؛ هر بر إسمنده صوڭسز نعمتلر بولونديغى ايچون صوڭسز حمدلرى، شكرلرى إستلزام ايدرلر

و كذا بتون نعمت خزينه‌لرينى آچمق صلاحيتنده اولان نعمتِ ايمانه وسيله اولان حضرتِ محمّد عليه الصلاة والسلام دخى اويله بيوك بر نعمتدر كه؛ نوعِ بشر إلى‌الأبد او ذاتى (ع‌ص‌م) مدح و ثنا ايتمگه بورجليدر. و كذا مادّى و معنوى بتون نعمتلرڭ أنواعنه فهرسته و قايناق اولان إسلاميت و قرآن نعمتى ده غيرِ متناهى حمدلرى بِالإستحقاق إستلزام ايدر

سكزنجى نقطه: اويله بر اللّٰهه حمد اولسون كه، كائنات ايله تعبير ايديلن شو كتابِ كبير و اونڭ تفسيرى اولان قرآنِ عظيم الشانڭ بياننه گوره بتون بابلريله فصللرى و بتون صحيفه‌لريله سطرلرى و بتون كلماتيله حرفلرى، او ذاتِ أقدسه (صفاتِ جماليه و كماليه‌سنى إظهار ايله) حمد و ثناخواندر