يدنجى نقطه: نورِ ايمان ايله بيلينير كه: اللّٰهڭ وارلغى بتون نعمتلرڭ فوقنده اويله بيوك بر نعمتدر كه؛ صوڭسز نعمتلرڭ أنواعنى، نهايتسز إحسانلرڭ جنسلرينى، صاييسز عطيّه‌لرڭ صنفلرينى حاوى بر منبع و بر قايناقدر. بناءً عليه ذرّاتِ عالمڭ عددنجه ايمان نعمتنه حمد و ثنا ايتمك بر بورجدر. رسالۀِ نورڭ أجزاسنده بر قسمنه إشارتلر ياپيلمشدر. مع هذا ايمانِ بِاللّٰهدن بحث ايدن رسالۀِ نورڭ جزءلرى، بو نعمتدن پرده‌يى قالديره‌رق گوسترييور

{اَلْحَمْدُ ِﷲِ} لامِ إستغراقله إشارت ايتديگى عموم حمدلر ايله حمد ايديلمه‌سى لازم اولان نعمتلردن بريسى ده، رحمانيت نعمتيدر. أوت رحمانيت، ذوى الحياتدن رحمته مظهر اولانلرڭ صاييسنجه نعمتلرى تضمّن ايتمشدر. چونكه بِالخاصّه إنسان، هر بر ذى‌حياتله علاقه‌داردر. بو إعتبار ايله إنسان هر ذى‌حياتڭ سعادتيله سعيدلشير و ألملريله متأثّر اولور. اويله ايسه هر هانگى بر فردده بولونان بر نعمت، آرقداشلرينه ده بر نعمتدر

و كذا والده‌لرڭ شفقتلريله نعمتله‌نن چوجقلرڭ صاييسنجه نعمتلرى تضمّن ايدوب اوڭا گوره حمدلره، ثنالره كسبِ إستحقاق ايدنلردن بريسى ده رحيميتدر. أوت آننه‌سز آج بر چوجغڭ آغلاماسندن متأثّر و آجييان بر وجدان صاحبى، ألبته والده‌لرڭ چوجقلرينه اولان شفقتلرندن ذوق آلير، ممنون و محظوظ اولور. ايشته بو گبى ذوقلر برر نعمتدر، حمد و شكر ايسترلر

و كذا كائناتده مندمج حكمتلرڭ بتون أنواع و أفرادى عددنجه حمد و شكرلرى إقتضا ايدنلردن بريسى ده حكيميتدر. زيرا إنسانڭ نفسى، رحمانيتڭ جلوه‌لريله، قلبى ده رحيميتڭ تجلّياتيله نعمتلندكلرى گبى؛ إنسانڭ عقلى ده حكيميتڭ لطائفيله ذوق آلير، تلذّذ ايدر. ايشته بو إعتبارله آغز طولوسيله ”الحمد ِﷲ“ سويله‌مكله حمد و ثنالرى إستلزام ايدر