دييه‌بيليرم كه، بو نور رسالۀِ شريفه‌لرى بر گلستانِ جناندر. بو گلستاندن إستفاده ايده‌مه‌ين بدمايه‌‌لره، نصيبه‌دار اولاميانلره صد هزار تأسّف. ايشته او گبيلره إلهامِ ربّانى ايريشسين ده، يگرمى اوچنجى سوز رسالۀِ شريفه‌سنڭ آخرنده‌كى ايكى لوحه‌نڭ برنجيسى كه، حجابِ غفلتدن نهانى، ايكنجى لوحه‌ده‌كى زوالِ غفلتله عيانه تبديل ايده‌بيلسينلر.

جمله مؤمنينِ موحّدينڭ طريقِ هدايتده خطوه‌أنداز اولمالرى ايچون؛ جنابِ واجب الوجود حضرتلرينه قَولاً دعا و تضرّع ايتمكلگم و فعلاً ده هنوز درتده برينى يازاماديغم بو نور رسالۀِ شريفه‌لرينڭ فقيرده موجود اولانلرينى، إعتماد ايتديگم، محبّت و عشقى اولديغنى حسّ ايتديگم إخوانه، أزجمله (......) گبى ذواتِ محترمه، جمعه گونلرى فقيرخانه‌ده طوپلانلديغى وقت، بِالذّات اوقويور و أللرينه برر نور پارچه‌لرندن ويروب آقشامه قدر و بعض گيجه‌لرى اوقومقده دوام ايديلييور. هپمز جنابِ قادرِ قيّومه عبوديت و نيازيمزى ايفا ايدييورز و ذاتِ استادانه‌لرينه قارشى ده، بو بورجمز اولان دعاىِ استادانه‌لرينى ياد و تذكار ايدييورز.

جنابِ ذو الجلال و الكمال حضرتلرى محترم ذاتِ استادانه‌لرينى دنيالر طوردقجه نور رساله‌لرينى رهبرلكده، دلالتده و نور دلاّللغنده إلٰى آخر الدوران قائم بيورسون، دعاسنى هر نمازڭ آخرنده همشيره‌ڭزله برابر وردِ زبان ايتمشز، أفنديم حضرتلرى.