الحمد ِﷲ حقائقِ قرآنيه‌دن يومًا فَيَوْمًا نصيبه‌دار اولويورز و اولاجغز إن شاء اﷲ. همان جنابِ كبريا شو أنهارِ كوثرى، حياتِ باقيه خرمانى اولان محشره قدر آقيتسين، آمين.

استادم أفنديم، بوگون حركاتِ ماضيه‌م ايله أحوالِ حاضره‌مى مقايسه جهتى إخطار ايديلدى. على قدر الإستطاعه تدقيق ايتدم. نتيجه‌ده أحوالِ حاضره‌مى ”حمدًا ثمّ حمدًا“ ثقلت جهتنده پك خفيف و قيمت خصوصنده پك آغير بولدم. حركاتِ سابقه‌م ايسه بونڭ خلافنه‌در. الحمد ِﷲ جنابِ فيّاضِ حقيقى، عاجز، فقير، محتاج قوللرندن رحمتِ ربّانيه‌سنى أسيرگه‌مدى.

”آرمود پيش آغزيمه دوش“ قبيلندن هر نوع مالزمۀِ جرّاحيۀِ روحيه‌يى، حاذق بر اوپراتورله برابر إحسان بيوردى. أگر بزلر، بو عملياتى گورمسه ايدك و بو نورلى و ذوقلى، شوقلى إحرامه گيرمه‌سه ايدك، حبِّ جاه يوزندن عجبا هانگى بدعتدن گرى طوره‌جقدق.

ايشته لاَ يُعَدّ وَ لاَ يُحْصٰى نورلرڭ بى‌پايان فيوضاتى، زمره‌’ِ موحّدينى مديونِ شكران بيراقمشدر. ”الحمد ِﷲِ ربّ العالمين“

همان جنابِ حق جمله اُمّتِ محمّدى (ع‌ص‌م) أنوارِ قرآنيه‌دن مستفيد و حقيقى موحّدين صنفنه إلحاق و شيمدى‌يه قدر غفلتله گچيرديگمز زمانلردن، دفترِ أعمالمزه يازيلان سيّئاتمزى، رحمتيله عفو بيورسون، آمين.

بر ميدانِ مجادله و إمتحان اولان شو دنيانڭ هر كوشه‌سنده بشره درسِ عبرت اولاجق بر حادثه، بر نمونه أكسيك دگل. هر يرده مختلف المزاج إنسانلرده آيرى آيرى تمايلاتِ قلبيه بولونويور. حادثاتِ دنيويه ايچنده، أڭ أليم اولان شيئڭ، مسلكِ اُخرويه و دينيه پرده‌سى آلتنده وحشت و حيوانيت روحلريله قارشيلاشمق اولديغنى تجربه‌لرم و مشاهده‌لرم بڭا اوگرتييور.