خلاصه: قرآنِ معجز البيانڭ أحكامِ بى‌نظيرندن اولان شو رسالۀِ إستعاذۀِ فرقانيه‌يى مطالعه‌مده، درياىِ حقائقده سرمستِ حيران قالارق كمالِ عشقله ديدم: يا ربّ، شو كتابِ مبينڭ إنفاذِ أحكامنى تسهيل و تيسير و دلاّلِ قرآنى ده آمال و مقاصدنده موفّق و جميع إخوانمله برابر بو كَمْتَرْ قولڭى ده، حلولِ أجلمه دگين، كتابِ مبينه خادم بيور، دعاسيله عريضۀِ عاجزيه‌يه خاتمه ويررم.

بو دفعه إرسالنه عنايت بويوريلان حكمت الإستعاذه‌نڭ ايكنجى قسمنى آلدم. سكزنجى إشارتده إثبات ايديلوب گوستريلن حق و حقيقت، ضلالت واديلرنده اوچان سرسرى مضللرڭ يوللرينى پك واضح تنوير ايله، اونلره هم كنديلرينڭ نه ياپدقلرينى، هم جادّۀِ حقيقتى گوسترمكله ايجازيله عظيم بر مسئله تحليل بيورلييور.

طوقوزنجى إشارتده ايسه، بتون أهلِ ايمان و بِالخاصّه رسالۀِ أنوار ايله خلقتِ إنسانيه‌نڭ غايۀِ حقيقيسنى آڭلامايه چاليشان طلبه‌لريڭز، روحًا إستقباله گيتدكجه، بو مسئله پك گنيش بر دائره اولارق، حضرتِ آدمدن بَرى بتون پيغمبرانِ عظام حضراتنڭ أهلِ ضلالته قارشى مغلوبيتى و فجيع حادثه‌لر چوق دوشونديرييور و قلبى زده‌لييوردى. {اَلْحَمْدُ ِﷲِ هٰذَا مِنْ فَضْلِ رَبِّى} او گنيش دائره اويله تنوير ايديلييور كه؛ ايچنده استاددن، فخر المرسليندن، حضرتِ آدمه قدر مشكلات، حق و حقيقت قلنجى ايله فتح ايديلوب، عقل و قلب ”صَدَقْتَ وَ بِِالْحَقِّ نَطَقْتَ“ دييه تصديق ايدييورلر