بو دفعه رؤياده فخرِ عالم عليه الصلاة والسلام أفنديمز حضرتلرينى گورديگم وقت، سورۀِ حجّڭ نهايتنده {مَا قَدَرُوا اﷲَ حَقَّ قَدْرِهِ اِنَّ اﷲَ لَقَوِىٌّ عَزِيزٌ} إلخ.. اوقويه‌رق و شاهِ گيلانى (قُدِّسَ سِرُّهُ) حضرتلرينى گورديگم وقت، سورۀِ نورده {لَيْسَ عَلَى اْلاَعْمٰى حَرَجٌ} آيتنى قرائت ايده‌رك نومدن بيدار اولدم. و آڭلادم كه، بو آخرده سنّتِ سنيه‌يه دائر مهمّ بر رساله يازيلديغى ايچون، رسولِ أكرم عليه الصلاة والسلامڭ مقبولى اولمش كه، رؤيامده مشرّف اولدم. و او آيت رسالۀِ نورڭ خلاصه‌سنى إفاده ايتديگى گبى، أهلِ غفلتى شدّتلى تهديد ايدر. شاهِ گيلانى‌يى گورديگمڭ سببى، رسالۀِ نورڭ طلبه‌لرينڭ قدسى بر استادى، بنى ده شاكرد قبول ايتديگنه دائر بر إشارت آڭلادم و بو آيتلر حوصله‌مڭ خارجنده اولديغى حالده، او قدسى ذاتلرڭ حرمتنه، قوّۀِ حافظه‌مده هر زمان اوقور و بر گنيشلك حاصل اولوردى

ديگر بر رؤيامده، پك گنيش بر دائره، تمللرى هنوز إنشا ايديلييور گورمشدم. بو دفعه او بيوك بنا إكمال ايديلمش، ايچنه گيرديگمده صاغ جهتنى جامعِ شريف اولارق گوردم. و نماز قيلدقدن صوڭره، بتون يازيلان رسالۀِ نورى بڭا ويرديلر. بن ده يالڭز بر عددينى اوراده اوقومق اوزره ويردم. بنانڭ أڭ يوكسك و اورته‌سنده بر ديكمه‌سنڭ دگيشمسى ايچون أللرنده دمير وينچ ايله چاليشانلر اوچ كيشى ايديلر، گوردم. تعبيرينى سز استاديمه حواله ايدييورم

بو كرّه إكمالنه موفّق اولابيلديگم اوچ رسالۀِ شريفه كه؛ يگرمى دردنجى، يگرمى طوقوزنجى سوز، اوتوز برنجى مكتوبڭ بشنجى لمعه‌سى مرقات السنّه رساله‌لرى براىِ تصحيح و منظورِ استادانه‌لرينه بيورلمق اوزره تقديم ايديلدى. رسالۀِ شريفه‌لرڭ جمله‌سى، برر حقيقت نورى فيشقيران برر گلستانِ جناندر. هله اوتوز برنجى مكتوبڭ لمعه‌لرى كه، منهاج السنّه و گركسه ترياق مرض البدعه اولان مرقات السنّه اوقونمغه طويولماز. اوقودقجه حسّ ايديلن معنوى سُرور و فيوضاتڭ حدّ و حدودى بولونماز بر عمّانِ فيضدر. بعض جمله‌لر اولويور كه، نمازدن أوّل و صوڭره فقيرخانه‌يه گلن إخوانه متعدّد دفعه‌لر اوقويوب فيضلنييورز. هله گريدلى حسن أفندى، گوزياشلرندن كنديسنى آلامييور. معلومِ استادانه‌لرى، كنديسى قادرى شيخيدر. ذاتِ استادانه‌لرينه و باخصوص غوثِ أعظم شيخ گيلانى حضرتلرينه مربوطيت و محبّتى درجۀِ نهايتده‌در