محترم استادم! بو إشارتى يازاركن، وجود عالمنه سياحته چيقدم. إشاراتده‌كى نقطه‌لر بر مفتّش حكمنه گچدى. ايضاح بويوريلان قوّتلر يرنده گورولوب، تسليمِ سلاح ايتمك اوزره ايديلر. بزه بو قوّتلرى گوسترن قرآنِ حكيمدن إستمداد و فيضى، هر خطوه‌لرمده ايسته‌يوردم. و بزه بو أساس حقيقتِ حياتڭ نتيجه‌لرينى، قراڭلقلرينى گوسترن استاديمز، موفّقيتمزى جنابِ حقدن ديله‌مكده اولديغى، هر آن كندينى گوسترمكده‌در. و إن شاء اﷲ خلاص ايده‌جكدر.

محترم استادم! بو اون اوچ إشارت، اون اوچ جواهر كومه‌سنى محتويدر. بونلردن بعضلرينى ايپه چيزوب گوسترمكله و چيزمه‌مكله و گورمه‌مكله، او جواهر خزينه‌سنه و جوهرلرينه بر نقيصه گلميه‌جگندن أگرى و طوغرى چيزمك ايستديگم جوهرلر، إن شاء اﷲ حُسننى ضايع ايتمز.

أى سَوْگيلى استادم، نه قدر تشكّراتِ وفيره ايفا ايتسه‌م و خيلى منّتدار اولسه‌م، ينه ايفا ايده‌ميه‌جگمه قائل اولديغمدن، ديلرم جنابِ حقدن راضى اولاجغڭز قدر نائلِ مكافات أيله‌سين. آمين بِحُرْمَةِ سيّد المرسلين.

حافظ على (رح)

حسابسز حمد و شكر اول خالقِ منّان حضرتلرينه كه، بن اُمّى اولديغم حالده، حسّيات و أمللريمى، شو فانى و آفل اولان حياتِ دنيادن تجريد ايله، رسالۀِ نور طلبه‌لرى ايچنه گيردم و حزب القرآن عالملرينه آرقداش اولدم. خدمتِ نشريه‌ده و علمده اونلره يتيشه‌مييورم. فقط إن شاء اﷲ إرتباط و محبّت و إخلاصده يتيشمگه چاليشه‌جغم. و دعا ايله اونلرڭ قلملرينه يارديم ايدييورم. رسالۀِ نوره قارشى حسّياتمى امّيلگم مناسبتيله يالڭز رؤيالرمله عرض ايدييورم