شفقتلى استادم! خدمتِ قرآنده و رسالۀِ النورڭ نشرياتنده‌كى ذرّۀِ واحده قبيلندن اولان مساعينڭ نزدِ عالئِ استادانه‌لرنده حسنِ قبوله مظهريتى، ضعيف، عاجز، فقير خدمتكاريڭز و إقتدارسز، إدراكى ناقص، إحاطه‌سى طار، شعورى مختل طلبه‌ڭزى نه درجه سَوينج و سروره قلب ايتديگنى تعريف ايده‌مم

بويله معنوى و قدسى تقديراته مظهر بويوريلان و بزم گبى گناهكارلره، اوتوز سنه‌لك إشتياقله، اون سنه‌لك مناجات و نياز مقابلنده سز استاديمزى إحسان بيوران و قوللرينڭ عصيانلرينه باقميه‌رق هر ايستدكلرينى بيلن، ايشيدن و بالغًا ما بلغ ويرن و بتون مكوّناتى يدِ قدرتنده طوتان و هر شيئه صاحب و مالك و حاكم بولونان جنابِ حق و فيّاضِ مطلق حضرتلرينه نه صورتله حمد و شكر ايده‌جگمى بيله‌مييورم

قيمتلى استادم! سز توسّط بيورڭز، دگرسز خدمتمزله، پك آز و قيصه اولان شو دنيا حياتى ايچنده بلكه بر قطره مثابه‌سنده‌كى حمد و شكريمزى ”تقبّل اﷲ“ سرّينه مظهر بيورسون إن شاء اﷲ

مكتوبات رساله‌سنڭ ايكنجى مكتوبنى دائما خاطرلايه‌رق بو أمرلريڭزه رعايت ايتمگه چاليشديغم حالده بر مُجبرِ غيبى بنده‌ڭزى تحريك ايده‌رك، ايكنجى مكتوبه مخالفته سَوق ايدييور

نيّتم خالص، صداقت و مربوطيتم جدّى و چوق صاغلام. هر درلو ريادن عارى و هيچ بر مادّى منفعته معطوف و مستند اولميان، اﷲ رضاسى يولنده، قرآن نامنه و رسالة النوره خدمت غايه‌سنه معطوف و بِالخاصّه بزم گبى عاجز، عاصى و گناهكارلرڭ هدايت و إرشاد و ايصالنه و أهلِ ضلالتى و أهلِ بدعه‌يى طريقِ حقّه دعوت و حقائقِ ايمانيه‌يه خادم بر قدسى ذات، بزلره و مملكتمزه ”وديعة اﷲ“ اولارق إحسان بيورلمش. قيمتلى مسافريمز ناصلكه بز گناهكارلرڭ معنوى يارديمنه قوشييور و گيجه و گوندوز مغفرتِ إلٰهيه‌يه و إرشاديمزه چاليشييورسه، بزلر ده بو عزيز مسافريمزڭ مادّى يارديمنه سَوه سَوه و إشتياقله و آنجق اﷲ ايچون قوشمق و چاليشمق وظيفه‌سيله مكلّف بولونديغمزى حسّ ايدييورز