گلن جواب معنوى جانبدن گلدى. بڭا دينلدى كه: ”سن، يگرمى سنه أوّل معنوى سؤاله ويرديگڭ جواب، سنڭ بو سؤالنه عين جوابدر. يعنى: أگر غالب طرف إلتزام ايديلسه ايدى، ينه ميمسز مدنيت نامنه غالبانه ممانعت گورميه‌جك بر طرزده بو رژيمى عالمِ إسلامه، مواقعِ مباركه‌يه تشميل و تطبيق ايديله‌جكدى. اوچ يوز أللى ميليون إسلامڭ سلامتى ايچون بو ظاهر ياڭليشى گورمديلر، كور گبى حركت ايتديلر.
* * *
بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
    عزيز، صدّيق، مبارك قارداشلرم!
    سزلرڭ بو بايرام معنوى هديه‌ڭز، بايراممى اويله بر تبريك ايتدى كه، بيڭلر كدرم اولسيدى سيله‌ردى. بيڭ بارك اﷲ. بويله بر زمانده بويله إخلاصلى صداقت، لِوجه اﷲ اخوّت و فى سبيل اﷲ معاونت آنجق عالى همّت صدّيقينلرده بولونور. خالقِ ذو الجلاله حدسز حمد و شكر اولسون كه، سزڭ گبيلرى قرآنِ حكيمه خادم و رسالۀِ النوره شاكرد أيله‌مش
* * *
    خسرو قارداش! سنڭ، عموم قارداشلرڭ نامنه بايرام تبريكى حسابنه باشده قرآنڭ باشده‌كى چوق شيرين و گوزل جزءلرى اولارق مكتوباتڭ قسمِ أعظمنى هديه ايتمكلگڭز، بيڭ تبريك حكمنده اولدى. بيڭ بارك اﷲ