قارداشلرم! بوگونلرده برى رسالة النور طلبه‌لرينه، ديگرى بڭا عائد ايكى مسئله إخطار ايديلدى. أهمّيتنه بناءً يازييورم:
    برنجى مسئله: برنجى شعاعده ايكى اوچ آيتڭ إشاراتنده، رسالة النورڭ صادق طلبه‌لرى ايمانله قبره گيره‌جكلرينه و أهلِ جنّت اولاجقلرينه دائر قدسى بر مژده و قوّتلى بر بشارت بولونديغى گوستريلمشدر. فقط بو پك بيوك مسئله‌يه و چوق قيمتدار إشارته تام قوّت ويره‌جك بر دليل ايستر دييه بكلردم. چوقدن بَرى منتظردم. ِﷲ الحمد ايكى أماره بردن قلبمه گلدى:
    برنجى أماره: ايمانِ تحقيقى علم اليقيندن حقّ اليقينه ياقينلاشدقجه داها سلب ايديلميه‌جگنه أهلِ كشف و تحقيق حكم ايتمشلر و ديمشلر كه: سكرات وقتنده شيطان وسوسه‌سيله آنجق عقله شبهه‌لر وىروب تردّده دوشوره‌بيلير. بو نوع ايمانِ تحقيقى ايسه يالڭز عقلده طورمييور. بلكه هم قلبه، هم روحه، هم سرّه، هم اويله لطائفه سرايت ايدييور، كوكله‌شييور كه، شيطانڭ ألى او يرلره يتيشه‌ميور؛ اويله‌لرڭ ايمانى زوالدن محفوظ قالييور. بو ايمانِ تحقيقينڭ وصولنه وسيله اولان بر يولى، ولايتِ كامله ايله كشف و شهود ايله حقيقته يتيشمكدر. بو يول أخصِّ خواصّه مخصوصدر، ايمانِ شهوديدر.
    ايكنجى يول: ايمانِ بِالغيب جهتنده سرِّ وحيڭ فيضيله برهانى و قرآنى بر طرزده، عقل و قلبڭ إمتزاجيله حقّ اليقين درجه‌سنده بر قوّت ايله، ضرورت و بداهت درجه‌سنه گلن بر علم اليقين ايله حقائقِ ايمانيه‌يى تصديق ايتمكدر. بو ايكنجى يول؛ رسالة النورڭ أساسى، مايه‌سى، تملى، روحى، حقيقتى اولديغنى خاص طلبه‌لرى گورويورلر. باشقه‌لر دخى إنصافله باقسه، رسالة النور حقائقِ ايمانيه‌يه مخالف اولان يوللرى غيرِ ممكن و محال و ممتنع درجه‌سنده گوسترديگنى گوره‌جكلر.
    ايكنجى أماره: رسالة النورڭ صادق شاكردلرى، حسنِ عاقبتلرينه و ايمانِ كامل قزانمالرينه او درجه كثرتلى و مقبول و صميمى دعالر اولويور كه، او دعالرڭ ايچنده هيچ برى قبول اولمامسنه عقل إمكان ويره‌ميور.