عزيز، صدّيق، قيمتدار قارداشلرم و خدمتِ قرآنيه‌ده متين، جدّى، چاليشقان آرقداشلرم!
    يڭى بر مدارِ كرامت و عنايت و سُرور اولان مكتوبڭزى آلدم. و رسالة النوره عائد بر إكرام و عنايتِ إلٰهيه‌يى گوستردى. شويله كه:
    بوندن درت بش گون أوّل، شدّتلى بر تحرّى ايله منزلم تفتيش ايديلدى. هر طرفه باقدقلرى حالده حفظِ إلٰهى ايله بزى محزون ايده‌جك بر شى بولاماديلر. يالڭز إقتصاد، خسته‌لر، إستعاذه گبى آلتى يدى رساله‌ىى ضررسز بولديلر. صوڭره ده خسروڭ أذان مسئله‌سى گبى مصادره قاعده‌لرينه تام مخالف اولارق نقصانسز إعاده ايتديلر. بن او حادثه‌دن سزه أنديشه ايدوب، طاغدن دونركن عبد المجيد، صبرى، خسرو، حافظ على ايله برابر قونوشمق، عجبا سزه ده بر تعرّض وار مى دييه صورمق ايستدم. و لسانله باغيردم، گلدم. بردن أمين قپويى آچدى، درديڭزڭ مبارك مكتوبلريڭزى ويردى. هر ايكيمز بو إكرام و تحرّيده‌كى كرامتِ حفظيه‌يى و خسروڭ خلافِ مأمول اويله بر إستدعا، اويله بر نتيجه ويرمه‌سنده‌كى عنايتِ ربّانيه‌يه عين زمانده موافق گوردك و رسالة النور هر وقت عنايته مظهردر دييه شكر ايتدك.
    عزيز قارداشلرم! فهرست بقيه‌سنڭ تأليفى سزه حواله ايديلمشدى، تقسيم الأعمال طرزنده ياپسه‌ڭز ايى اولور.
    ما شاء اﷲ، بارك اﷲ، قلملريڭزڭ مكمّل چاليشمالرى دوام ايتمكله برابر تزايد ايتمه‌لرى و خصوصًا صاوده بردن چوغالمه‌سى... حاجى حافظه و كوينه بيڭ بارك اﷲ، بزى فوق العاده مسرور ايتدى. و خسروڭ توافقلى يازيلرى، خصوصًا يالديزلى معجزاتِ أحمديه (ع‌ص‌م) نسخه‌سى و بيوك و كوچك عليلرڭ رساله‌لرى بورالرده طاتلى هم چوق فتوحاتى وار. إن شاء اﷲ او مبارك قلملرڭ داها چوق فتوحاتى اولاجق و گوره‌جگز