عزيز و صدّيق و خالص قارداشلرم!
    ربِّ رحيممه حدسز شكر اولسون كه؛ سزڭ گبيلرى رسالة النوره صاحب و ناشر و محافظ خلق ايتمش، بنم گبى عاجز بر بيچاره‌نڭ ضعيف اوموزنده‌كى آغير يوكى چوق خفيفلشديرمش.
    قارداشلرم! بو دفعه اوچ مكتوبڭزده بردن اوچ خلوصى، اوچ صبرى، اوچ حقّى گبى قيمتدار طوقوز قارداش گوردم. حپسده، عبد الرحمانڭ پدرى يرنده بنم ألبسه‌لريمى يامالايان حقّينڭ جدّى و حقيقتلى اخوّتنى و طلبه‌لگنى، تخمينمدن داها ايلرى ترقّى ايتديگنى بيلدم، چوق مسرور اولدم.
    صبرى قارداش! بنى صاران و باغلايان آغير قيدلره أهمّيت ويرمييورسڭ. حالبوكه بوراده‌كى أوهاملى أهلِ دنيا بنم ايله پك فضله مشغول و علاقه‌داردرلر. حتّى.. حتّى.. حتّى... هر نه ايسه.
    هم بنم حقّمده بيڭ درجه حدّمدن زياده حسنِ ظن ايله قيمت و مقام ويرمك، يالڭز رسالۀِ النور نامنه و اونڭ خدمتى و قرآن ألماسلرينڭ دلاّللغى حسابنه قبول اولابيلير. يوقسه هيچ أندر هيچ اولان شخصم إعتباريله قبوله حقّم يوق. پارلاق و چاليشقان قلميله هم رسالة النورڭ، هم بزم خاطره‌لريمزده چوق أهمّيتلى موقع طوتان و يرلشن حافظ توفيقڭ يازديغى آيت الكبرا رساله‌سنى مناسب گورديگڭز زمانده گوندريرسڭز. طوقوز سنه يازيلريله مسرورانه اُنسيت ايدن گوزلرم، حسرتله او يازيلرى گورمك ايسته‌يور.
    قيمتدار خلوصى و حقّى گبى قارداشلرم! حقّينڭ ديديگى گبى، صبرينڭ مكتوبلرينى عينًا اونلرڭ يرينه قبول اولمش؛ او جهتده خلوصى ايله مخابره كسيلمه‌مش، دوام ايدييور. حدسز شكر و حمد و ثنا اولسون كه؛ رسالة النور گيتدكجه پارلاق، خارقانه فتوحاتِ ايمانيه ياپار. كندى كندينه إن شاء اﷲ هر گورنڭ قلبنده يرلشير، معنّدلرى صوصديرر. بر حفظِ غيبى آلتنده دشمنلرى شاشيرتمش، كور گوزلرى اونى گورمييور. ايزينى بولاماديغى حالده، پارلاق فعاليتنى مشاهده ايدييورلر. بو وقت پك زياده إحتياط لازم.