ثانيًا: سزه بر كوچك سهوڭ بيوك بر نكتۀِ غيبيه‌سيله، قارشى صحيفه‌ده‌كى حاشيه‌يى، موقعلرنده يازمق ايچون گوندردم
    ثالثًا: خلوصينڭ بر غائله‌سى وار دييه حسّ ايدييورم. مراق ايتمه‌سين. رسالۀِ النورڭ شاكردلرينه عنايت و رحمت، نظارت و حمايت ايدرلر. دنيانڭ مشقّتلرى مادام ثواب ويرر، گچرلر؛ او مصيبتلره قارشى صبر ايچنده شكر ايله، متانتله مقابله ايديلمك گركدر. هم او، هم سزلر بتون دعالرمده و قزانجلرمده بنمله برابرسڭز
    رابعًا: رسالة النور كندى كندينه قرآنڭ حمايتى و حفظِ ربّانى آلتنده إنتشار ايدييور. إمامِ على (ر‌ض) ايكى دفعه ”سرًّا، سرًّا“ ديمسى إشارت ايدر كه، پرده آلتنده داها زياده فيض و نور ويرر. سزڭ گبى قارداشلرم، زمانڭ صارصينتيلى حادثاتنه قارشى، (شيمدى‌يه قدر گبى) ينه تام مقاومت ايدر اميدنده‌يم. {مَنْ اٰمَنَ بِالْقَدَرِ اَمِنَ مِنَ الْكَدَرِ}  دستوريمز اولمالى.
* * *
    عزيز قارداشلرم!
    بِالمقابله بايرامڭزى تبريك ايدرم.
    صحّتمى صورييورسڭز. بورانڭ چوق شدّتلى قيشى و اوطه‌مڭ چوق صوغوغى و اوچ حزين غربتڭ تأثيرى و اوچ عصبى خسته‌لغڭ صيقينتيسى و بتون بتون يالڭزلق ايله قابلِ تحمّل اولميه‌جق چوق زحمتلره معروض اولديغم حالده، خالقمه حدسز شكر ايدرم كه، هر دردڭ أڭ قدسى درمانى اولان ايمانى؛ و ايمانِ بِالقدردن، قضايه رضا علاجنى إمداديمه گوندردى، تام صبر ايچنده شكر ايتديردى.