رسالۀِ النور، طريقت دگل حقيقتدر. آياتِ قرآنيه‌دن ترشّح ايدن بر نوردر. نه شرقڭ علومندن و نه ده غربڭ فنونندن آلينمش دگل. قرآنِ معجز البيانڭ بو زمانه مخصوص بر إعجازِ معنويسيدر. منفعتِ شخصيه يوقدر. رسالۀِ النورڭ (هيچ اولمازسه) سوز و مكتوبلرينى تماميله اوقويونجه بر چوق حقيقتلر تظاهر ايده‌جگندن، بوگونكى دوشونجه‌ڭزدن، يعنى رسالۀِ النورى يازمقده چكينمك و چكيلمكدن درحال تبرّى ايده‌جكسڭز.
    محترم دگرلى قارداشم! درحال يازمغه باشلايڭز، قورقمايڭز. خدمتِ قرآن، إن شاء اﷲ محافظه ايده‌جكدر. ديگر أفندى‌يى زيارته گيدنلره و رسالۀِ النورى يازان او حواليده‌كى قارداشلريمزه گچمش اولسون (حاشيه). حافظِ حقيقى إن شاء اﷲ محافظه ايده‌جكدر. إمامِ على‌نڭ (رض) {تُقَادُ سِرَاجُ النُّورِ سِرًّا بَيَانَةً ❊ تُقَادُ سِرَاجُ السُّرْجِ سِرًّا تَنَوَّرَتْ} أمرينه إنقياد ايتمك ايجاب ايتديگندن، رسالۀِ النورى گيزلى اوقومق، گيزلى يازمق، گيزلى نشر ايتمك لازمدى. او قارداشلريمزڭ بو أمره رعايت ايتمه‌مسندن ايلرى گلديگندن، خفيف شفقت طوقادى ييدكلرندن تكرار گچمش اولسون.
    هيچ مراق ايتمه‌سينلر، هيچ بر شى ياپيلماز و ياپاماز و گوره‌مزلر. بو حادثه‌دن متأثّر اولوب چكينمه‌يڭز. بِالعكس چاليشماڭزى زياده‌لشديرڭ كه، تجربۀِ ميدانِ إمتحانده موفّق اولاسڭز. رسالۀِ النوره صيق صيق ايليشيرلر، فقط بر خلط ايده‌مزلر. چونكه غوثِ أعظم (ق س) و إمامِ على (رض) گبى ذاتلرڭ حمايه‌لرى و دعالرى بركاتنه، حافظِ حقيقى حفظ ايدر. {اَلْحَمْدُ ِﷲِ هٰذَا مِنْ فَضْلِ رَبِّى} روحانى إنقباض إن شاء اﷲ گچه‌جكدر. رسالۀِ النور {لِلَّذِينَ اٰمَنُوا هُدًى وَشِفَاءٌ} سرّينه مظهردر. اوندن إستمداد ايت. رسالۀِ النور طلبه‌لرى بربرينڭ عبادتندن حصّه‌دار اولدقلرندن، دائمى وردلرى اولان بو آيتِ عظيمه سزه ده شفا ويرر. رسالۀِ النورى يازيڭز. إحتياطه رعايت ايديڭز.
   
    بتون قارداشلريمه سلام و حرمتلر. رسالۀِ النوره چاليشماڭزى تكرار توصيه ايدرم، قارداشلرم.
قارداشڭز
صلاح الدين