رشدى أفندى بنم طرفمدن شكرى أفندى‌يه، تعزيه‌نامه‌سى اولان اون يدنجى مكتوبى، بنم يرمده اوقوسون.
    رسالۀِ النورڭ قپودانى صبرى، نيس آطه‌سنده‌كى بر قارداشمز و اوننجى سوزڭ طبعندن صوڭره تهلكه‌دن محافظه ايچون قاچ آى خانه‌سنده صاقلايان و پدر و والده‌سيله، بزمله جدّى علاقه‌دار بولنان ولى أفندينڭ پدر و والده‌سنڭ وفات خبرلرينى يازييور. جنابِ حق اونلره رحمت أيله‌سين. بن إن شاء اﷲ چوق زمان اونلرى معنوى قزانجلريمه شريك ايده‌جگم.
* * *
    عزيز، صدّيق قارداشلرم!
    بو زمانده خصوصًا بو صره‌لرده، رسالۀِ النورڭ شاكردلرى تام بر متانت و تساند و دقّت ايتمگه محتاجدرلر. ِﷲ الحمد إسپارطه و حواليسى قهرمانلرى دمير گبى بر متانت گوسترمه‌سيله، باشقه يرلره ده حسنِ مثال اولدى.
    أى خسرو! تأثيرلى و گوزل مكتوبڭى آلدم. وطيفه‌ڭڭ باشنه گچمه‌ڭ، بزى فوق العاده مسرور ايتدى. بيڭلر صفالر ايله گلدڭ. سن، بر بچوق سنه مادّى قلمڭ ايشله‌مديگندن مراق ايتمه. سنڭ يريڭه و كرامتلى قلمڭڭ يادگارى اولان معجزاتِ أحمديه‌نڭ برى ولاياتِ شرقيه‌ده فعالانه گزييور. ديگر صوڭ يازديغڭ نسخه ده، إستانبولده سنڭ يرڭده چاليشوب، إن شاء اﷲ فتوحات ياپار. سنڭ يازديغڭ معجزه‌لى ايكى قرآنِ عظيم الشانڭ بو حواليده خصوصًا رمضانِ شريفده سڭا قزانديردقلرى ثوابلرى و تحسين و تبريكلرينى، إن شاء اﷲ ياقىنده طبعه گيرمه‌سيله، عالمِ إسلامدن سنڭ روحڭه ياغاجق رحمت دعالرينى دوشون، اللّٰهه شكر أيله.
    حافظ علينڭ مكتوبنده، إسلام‌كوينده‌كى خواجه‌لره محبّته و دوستلغه قرار ويرمه‌سى بزى ممنون أيلدى. أوت إسلام‌كويى، ناصلكه رسالۀِ النوره پك زياده علاقه‌دارلقده إمتياز و سبقت قزانمش. اويله ده بن اوراده ايكن، سائر خواجه‌لره نسبةً إسلام‌كويى خواجه‌لرى دخى داها زياده إنصافلى و رسالۀِ النورى تقدير ايتدكلرينى گوردىگمدن، بو حواليده‌كى خواجه‌لرڭ لاقيدلقلرينه قارشى اونلرى حسنِ مثال گوسترييورم. إن شاء اﷲ اونلردن ضرر گلمز. بن إسلام‌كوينى نورس كويى گبى بيلييورم، او خواجه‌لره ده أقربام نظريله باقيورم، اونلره ده سلام ايدييورم. أوت اونلرڭ إنصافى و رسالۀِ النوره قارشى دوستلقلريله، نور فابريقه‌سى او كويده دغدغه‌سز تأسّس ايتدى تخمين ايدييورم.