عزيز، صدّيق قارداشلرم!
    رسالۀِ النورڭ إنتشارينه و فتوحاتنه قارشى گلن برى سماوى، برى أرضى ايكى مصيبته مقابله ايده‌جك آيرى بر عنايتِ إلٰهيه جلوه‌سى گورولمگه باشلادى.
    أرضى و إنسانى اولان مصيبت: إسپارطه‌ده و إستانبولده اولديغى گبى؛ قسطمونينڭ حواليسنده ده، أهلِ ضلالت رسالۀِ النورڭ إنتشارينه سد چكمك ايچون، خاص طلبه‌لرڭ و جدّى چاليشانلرڭ شوقلرينى قيرمق و اونلره فتور ويرمك ايچون، آيرى آيرى طرزلرده، عمومى بر پلان داخلنده تعرّض ايديلييور. خالصلره فتور ويره‌مه‌دكلرندن، باشقه مشغله‌لر بولمقله چاليشمالرينه ضرر ويرييورلر.
    سماوى مصيبت ايسه: إحتكار نتيجه‌سنده، حيات و يشامق حسّى، حسّياتِ دينيه‌يه غلبه چالوب، أكثر ناس معده‌سنى، معيشتنى دائما دوشونييور. حتّى أكثر فقرا قسمندن اولان رسالۀِ النور طلبه‌لرى، بو مصيبته قارشى چابالامق مجبوريتيله حقيقى و أڭ مهم وظيفه‌سى اولان نشر خدمتنى بيراقمغه مجبور اولويور.
    هم إنسانلرڭ ذهنلرى، فكرلرى قصدًا و بِالذّات حقائقِ ايمانيه‌يه قارشى بو يوزدن بر درجه لاقيدلق بر وضعيتى آلماسندن، بر توقّف دورى گلمسنه مقابل؛ جنابِ حقّڭ عنايت و رحمتيله باشقه بر طرزده رسالۀِ النورڭ إنتشار و فتوحاتنه ميدان آچمش. أزجمله: إستانبول آفاقندن  يوكسك علمانڭ؛ أسكى فتوا أمينى على رضا، أحمدِ شيرانى و پارلاق واعظلردن شمسى گبى ذاتلر، رسالۀِ النورله جدّى و تقديركارانه مناسبتدار اولمغه باشلامالريدر.