”بديع الزمان، شو زمانده دينِ إسلامه أڭ بيوك خدمت أيله‌ديگنى و أثرلرينڭ تام طوغرى اولديغنى؛ و بويله بر زمانده، محروميت ايچنده فراغتِ نفس ايدوب يعنى دنياىى ترك ايدوب، بويله بر أثر ميدانه گتيرمك هيچ كيمسه‌يه ميسّر اولماديغنى و هر صورتله شايانِ تبريك اولديغنى و رسالۀِ النور مجدّدِ دين اولديغنى و جنابِ حق اونى موفّق بِالْخير أيله‌سين، آمين“ دييه‌رك؛ بعضيلرينڭ صقال براقمامقلغنه إعتراضلرى مناسبتيله؛ مولانا جلال الدينِ رومينڭ پدرلرى اولان سلطان العلمانڭ بر قصّه‌سى ايله اونى مدافعه ايدوب، ديمش:
          ”بو مِثللو، بديع الزمانڭ دخى ألبته بر إجتهادى واردر. إعتراض ايدنلر حقسزدر.“ ديمش و خواجه مصطفى‌يه أمر ايتمش: ”سويله‌ديگمى ياز!“
    بديع الزمانه كمالِ حرمتله سلام ايدرم. تأليفاتڭزڭ إكمالنه حرزِ جان ايله دعا ايتمكده‌يم (يعنى، روحه نسخه اولاجق قدر قيمتداردر). بعض علماء السوئڭ تنقيدينه اوغراديغنه متأثّر اولمه. زيرا يمشلى آغاج طاشلانير، (حاشيه) قضيه‌سى مشهوردر. مجاهداتڭزه دوام بيورڭ. جنابِ حق و فيّاضِ مطلق عاجلاً مراد و مطلوبڭزه موفّق بِالْخير أيله‌سين! باقى حقّڭ برلگنه أمانت اولڭز.
أسكى فتوا أمينى على رضا
    ايشته بويله مدقّق و علم و شريعت و قرآن جهتنده بو زمانده سوز صاحبى أڭ بيوك عالم بويله حكم ايتمش. رسالۀِ النورڭ طلبه‌لرى، بو مسئله‌يى (إحتياطًا) يبانيلره اونڭ إسمنى ويرمكله تشهير ايتمه‌مك گركدر و دعالرينه اونى داخل ايتمك لازمدر.
    عموم قارداشلريمزه سلام.
* * *