إستانبولده معلوم إعتراض حادثه‌سى ايما ايدييور كه؛ ايلريده، مشربنى چوق بگه‌نن بعض ذاتلر و خودگام بعض صوفى مشربلر و نفسِ أمّاره‌سنى تام ئولديرمه‌ين و حبِّ جاه ورطه‌سندن قورتولميان بعض أهلِ إرشاد و أهلِ حق، رسالۀِ النوره و شاكردلرينه قارشى كندى مشربلرينى و مسلكلرينڭ رواجنى و أتباعلرينڭ حسنِ توجّهلرينى محافظه نيتيله إعتراض ايده‌جكلر، بلكه دهشتلى مقابله ايتمك إحتمالى وار. بويله حادثه‌لرڭ وقوعنده، بزلره إعتدالِ دم و صارصيلمامق و عداوته گيرمه‌مك و او معارض طائفه‌نڭ ده رؤسالرينى چوروتمه‌مك گركدر.
    فاش ايتمك خاطريمه گلمه‌ين بر سرّى، فاش ايتمگه مجبور اولدم. شويله كه:
    رسالۀِ النورڭ شخصِ معنويسى و او شخصِ معنوى‌يى تمثيل ايدن خاص شاكردلرينڭ شخصِ معنويسى ”فريد“ مقامنه مظهر اولدقلرى ايچون، دگل خصوصى بر مملكتڭ قطبى، بلكه (أكثريتِ مطلقه ايله) حجازده بولنان قطبِ أعظمڭ تصرّفندن خارج اولديغنى.. و اونڭ حكمى آلتنه گيرمگه مجبور دگل. هر زمانده بولنان ايكى إمام گبى، اونى طانيمغه مجبور اولمايور. بن أسكيده رسالۀِ النورڭ شخصِ معنويسنى، او إماملردن برسنى ظن ايدييوردم. شيمدى آڭلايورم كه؛ غوثِ أعظمده قطبيت و غوثيتله برابر ”فرديت“ دخى بولنديغندن، آخر زمانده شاكردلرينڭ باغلانديغى رسالۀِ النور، او فرديت مقامنڭ مظهريدر. بو گيزلنمگه لايق اولان بو سرِّ عظيمه بناءً، مكّۀِ مكرّمه‌ده دخى (فرضِ محال اولارق) رسالۀِ النورڭ عليهنده بر إعتراض قطبِ أعظمدن دخى گلسه؛ رسالۀِ النور شاكردلرى صارصيلمايوب، او مبارك قطبِ أعظمڭ إعتراضنى إلتفات و سلام صورتنده تلقّى ايدوب، توجّهنى ده قزانمق ايچون، مدارِ إعتراض نقطه‌لرى او بيوك استادلرينه قارشى ايضاح ايتمك، أللرينى اوپمكدر.
    أوت قارداشلرم؛ بو زمانده اويله دهشتلى جريانلر و حياتى و جهانى صارصه‌جق حادثه‌لر ايچنده، حدسز بر متانت و إعتدالِ دم و نهايتسز بر فداكارلق طاشيمق گركدر. {يَسْتَحِبُّونَ الْحَيٰوةَ الدُّنْيَا عَلَى اْلاٰخِرَةِ} آيتنڭ سرِّ إشاريسيله، آخرتى بيلدكلرى و ايمان ايتدكلرى حالده، دنياىى آخرته سوه‌رك ترجيح ايتمك و قيريله‌جق شيشه‌يى باقى بر ألماسه، بيله‌رك رضا و سوينجله ترجيح ايتمك و عاقبتى گورمه‌ين كور حسّياتڭ حكميله، حاضر بر درهم زهرلى لذّتى، ايلريده بر بطمان صافى لذّته ترجيح ايتمك، بو زمانڭ دهشتلى بر مرضى، بر مصيبتيدر. او مصيبت سرّيله، حقيقى مؤمنلر دخى بعضًا أهلِ ضلالته طرفدار اولمق گبى دهشتلى خطاده بولنويورلر. جنابِ حق أهلِ ايمانى و رسالۀِ النور شاكردلرينى بو مصيبتلرڭ شرّندن محافظه أيله‌سين، آمين   
سعيد النورسى