ايكنجى نقطه: بو دهشتلى إحتكاردن چيقان قحط و غلا و آجلق و ضرورت، يشامق طمارينى شدّتله ياره‌لانديرييور. بو ياره، حسّياتِ علويۀِ'ِ دينيه‌يى بر درجه صوصديرمغه وسيله اولوب، أهلِ ضلالته يارديم ايدييور. هركس معده‌سنى دوشونمگه باشلايور. قلب، حقيقتدن زياده أكمگى دوشونوب حياته، يشامغه يارديمه قوشوب، وظيفۀِ حقيقيه‌سنى ايكنجى درجه‌ده بيراقير. بوڭا قارشى رسالۀِ النورڭ شاكردلرى بر اوزون رمضان نظريله باقوب، كفّارت الذنوب و بر رياضتِ شرعيه‌يه چويره‌بيليرلر. علنًا نقضِ صيامله رمضانڭ حرمتنى قيران بدبختلره گلن او مصيبت، معصوملرى ده اينجيتير. فقط رسالۀِ النور شاكردلرى و معصوملرى، او مصيبتى لهلرينه دونديروب، خيرلى بر رياضته قلب ايدرلر. قناعت و إقتصادله قارشيلارلر.
    اوچنجى نقطه: ايكى مسئله‌در.
    برنجيسى: مدقّق خواجه صبرى، فيضى‌نڭ إستخراجنه دائر فيضى‌يه يازديغى مكتوب گوزلدر. لاحقه‌يه گيردكدن صوڭره، خواجه‌لر {فِيهِ نَظَرٌ} ديمه‌مك ايچون بعض كلماتى تعديل ايديلدى.
    ايكنجى مسئله: إستانبول علماسنڭ أڭ بيوگى و أڭ مدقّقى و چوق زمان مفتى الأنام اولان أسكى فتوا أمينى، مشهور على رضا أفندى؛ برنجى شعاع إشاراتِ قرآنيه و آيت الكبرا گبى رساله‌لرى گوردكدن صوڭره، رسالۀِ النورڭ مهم بر طلبه‌سى اولان حافظ أمينه ديمش كه: