عزيز، صدّيق قارداشلرم!
    نور فابريقه‌سنڭ صاحبى، برنجى شعاعڭ دردنجى آيتى بحثنده، حقيقتِ إسلاميتڭ يدى أساسى پارلاق بر صورتده إثبات ايديلديگى جمله‌سنه دائر صورويور كه: أركانِ إسلاميه‌يى بش بيلييورز. هم وجوبِ زكات ركنى، رساله‌لرده نه صورتله ايضاح ايديلديگنى صورويور.
    الجواب: إسلامڭ ركنلرى باشقه‌در، حقيقتِ إسلاميتڭ أساسلرى ينه باشقه‌در. حقيقتِ إسلاميتڭ أساسلرى؛ آلتى أركانِ ايمانيه ايله (حاشيه) و أساسِ عبوديت كه، إسلامڭ بش ركنى اولان (صوم، صلات، حجّ، زكات، كلمۀِ شهادت) مجموعنڭ خلاصه‌سيدر. رسالۀِ النور، آلتى ركنِ ايمانيه ايله بو أساسِ عبوديتى إثبات ايدوب {سَبْعَ الْمَثَانِى} جلوه‌سنه مظهريتى مراددر. وجوبِ زكاتڭ ايضاحندن مراد ايسه، زكاتڭ تفرّعات تفصيلاتى دگل؛ بلكه زكاتڭ، حياتِ إجتماعيه‌ده درجۀِ لزومى و أهمّيتلى قيمتى إثبات ايديلمش ديمكدر. أوت رسالۀِ النوردن أوّل يازديغمز رساله‌لرده، هم ده رسالۀِ النورڭ متعدّد يرلرنده، وجوبِ زكاتڭ حياتِ إجتماعيه‌ده نه درجه أهمّيتلى اولديغى قطعيًا و واضحًا إثبات ايديلمش ديمكدر.
    إسپارطه‌ده رسالۀِ النورڭ درس و نشرينه ايكى كوشكنى بر زمان تخصيص ايدن قارداشمز شكرى أفندينڭ ايكى گنج أولادينڭ وفاتى، بنى متأثّر ايتدى. چونكه بش آلتى ياشنده ايكن، معصومه كريمه‌سى يانمه گلدكجه، هر دفعه ”آدڭ نه‌در؟“ صورييوردم. معصومانه، كمالِ فخرله ”خير النساء“ ديردى، بنى شفقتله گولديرييوردى. جنابِ حق او مبارك معصومه‌يى بردن جنّتنه آلدى، شو دنيا جهنّمندن قورتاردى. و مرحوم مخدومى حياتى ايسه، خسته‌لق إن شاء اﷲ اونى ده خير النساء گبى گناهسز، معصوم ياپدى. برابر جنّت طرفنه گيتديلر. بو نقطۀِ نظردن بن او ايكى چوجغى تبريك ايدييورم. و پدر و والده‌لرينى ده هم تعزيه، هم معنًا تبريك ايدييورم كه؛ او ايكى أولادلرى {وِلْدَانٌ مُخَلَّدُونَ} سرّينه مظهر اولديلر. بن او ايكيسنى، رسالۀِ النورڭ وفات ايدن شاكردلرى ايچنده دعالريمزه داخل ايتدك.