أوت هر طرفده بو دردِ معيشت هركسى صارصييور. أهلِ ضلالت بوندن إستفاده ايدر. أهلِ ديانت ده كندينى معذور بيلير، ”ضرورتدر، نه ياپالم؟“ دير. ديمك كه، رسالۀِ النور شاكردلرى بو آجلق و ضرورت مصيبتنه قارشى، ينه نورله مقابله ايتملى. هر شاكردڭ وظيفه‌سى، يالڭز كندى ايماننى قورتارمق دگل؛ بلكه باشقه‌سنڭ ايمانلرينى ده محافظه ايتمگه مكلّفدر. او ده خدمته جدّى دوام ايله اولور.
    سزه يازمشدق كه، معارضلره عداوتله مقابله ايتمه‌يڭز. ممكن اولديغى قدر، أهلِ تقوا، أهلِ علمه قارشى دوستانه وضعيت آليڭز. فقط بو نقطه‌يه دقّت ايديڭز كه، رسالۀِ النورڭ ضررينه و شاكردلرينڭ صلابت و متانتلرينه ايليشه‌جك بر طرزده دائره‌ڭز ايچنه صوقمايڭز. اويله‌لر نيتِ خالصه ايله گيرمزسه، بلكه فتور ويررلر. أگر أنانيتلى و خودفروش ايسه، رسالۀِ النور شاكردلرينڭ متانتلرينى قيرارلر؛ نظرلرينى، رسالۀِ النورڭ خارجنه چكوب طاغيتيرلر. شيمدى چوق دقّت و متانت و إحتياط لازمدر.
    بو حواليده، حقيقةً اميديمڭ فوقنده، رسالۀِ النور طلبه‌لرندن ايكى قهرمان يتيشديلر. بابا، اوغول؛ أحمد نظيف، صلاح الدين. بو ايكى ذات رسالۀِ النورڭ نشرنده ايكى يوز آدم قدر چاليشدقلرينى گورويورز. أزجمله: بريسى يعنى اوغلى، قارصده طوروب هم وانه، هم أرضرومه، هم قونيه‌يه، هم بورالره (سزه لفًا گوندرديگم مكتوب گبى) مخابره‌لر ايله تأثيرلى بر صورتده چاليشييور؛ تام بر عبد الرحماندر.
قارداشڭز
سعيد النورسى