عزيز، صدّيق قارداشلرم!
    أسكى سعيد چوق زمان مدرسة الزهرايى غايۀِ خيال ايده‌رك چاليشمش. جنابِ حق كمالِ مرحمتندن، إسپارطه‌يى او مدرسة الزهرا حكمنه گتيردى. و ناحيه‌مز اولان كوچوجك إسپارطه‌نڭ محدود أقربا و أحباب يرينه، مبارك إسپارطه ولايتنى وىروب بيڭلر قارداشى إحسان أيلدى. بلكه محتملدر كه، او كوچك إسپارطه‌نڭ أصلى، بو بيوك إسپارطه‌دن گيتمش. بنم وطنِ أصليم، بو إسپارطه اولمق جائزدر. حتّى إسپارطه‌لى كيم اولورسه اولسون، باشقه‌لره نسبةً بنمله و رسالۀِ النورله فضله علاقه‌دار گورويورم. حتّى بوراده‌كى بتون ضابطان ايچنده برى مستثنا، أڭ زياده بزه و رسالۀِ النوره جدّى علاقه‌دار، بو حاملِ مكتوب إسپارطه‌لى حلمى بگى گوردم. اونى رسالۀِ النورڭ خاص شاكردلرى ايچنده قبول أيله‌دك.
    إسپارطه‌ده و صاوه‌ده‌كى تعرّض بر درجه عموميدر. رسالۀِ النورڭ إنتشار ايتديگى هر طرفده بو صره‌لرده، شيمدى‌يه قدر بر پلان داخلنده رسالۀِ النورڭ فتوحاتنه قارشى تجاوز وار. بر درجه شوق و نشئه‌يه ضرر ويردى، بر دورۀِ توقّف آچدى. شيمديكى قحطلغه او توقّف سببيت ويرييور. فقط جنابِ حقّه شكر، إسپارطه و حواليسى قهرمانلرى چليك گبى بر متانت گوسترمه‌لرى، سائر يرلرڭ ده قوّۀِ معنويه‌لرينى تقويه ايدييورلر.
    بعض إحتياطسز و دقّتسزلرڭ يوزندن جزئى ضررلر اولديغندن، إحتياط و دقّت هر وقت لازمدر. بارلاده رسالۀِ النورڭ موقّت تعطيلى سببيله ياغمورسزلق باشلاديغى گبى و رسالۀِ النورڭ مداخله‌سيله ياغمورڭ بارلا أطرافنده‌كى دائره‌يه مخصوص اولارق گلمسى و إسپارطه‌نڭ رسالۀِ النوره قارشى إشتياقلريله، (خسروڭ ديديگى گبى) ياغمور فوق العاده بر صورتده إمداده گلمسى گبى، پك چوق أماره‌لرله و بوراده رسالۀِ النور مناسبتيله وجوده گلن يوزر حادثه‌لرڭ دلالتيله ديرز كه: بو آناطولى‌يه عينِ رحمت اولان رسالۀِ النوره قارشى، بو عجيب زمانده بويله عمومى و گنيش بر تعرّضله و بعض يرلرده تعطيله مجبور اولماسى، بو قحط و غلايى و بو عجيب إحتكارى و بركتسزلك و آجلغى نتيجه ويرديگنه بزه قناعت ويردى. شيمدى يانمده‌كى أمين و فيضى گبى سائر آرقداشلرم ده عين قناعتده‌درلر.
سعيد النورسى
* * *