و ميليونلرله معصوملرڭ قانيله يوغرولمش بر قوّت يرينه، خالقِ كائناتڭ قدرت و رحمتنه طايانمق، أهلِ قرآنه فرض و واجبدر. گرچه زندقه و دينسزلك، او بوغوشانلرڭ بريسنه طايانوب أهلِ ديانتى أزر. او زندقه‌نڭ تضييقندن قورتولمق، اونڭ عكسى جرياننه طرفدار اولمق بر چاره‌در. فقط شيمدى‌يه قدر او طرفدارلق، بر منفعت ويرميه‌رك چوق ضررلرى طوقونمش.
    هم زندقه، نفاق خاصيتيله هر طرفه دونر. سنڭ دوستوڭى كندينه دوست ايدوب، سڭا دشمن ايدر. سنڭ طرفدارلق جهتيله قزانديغڭ گناهلر، فائده‌سز بوينڭده قالير. رسالۀِ النور شاكردلرينڭ وظيفه‌لرى ايمان اولديغندن، حيات مسئله‌لرى اونلرى چوق علاقه‌دار ايتمز و مراقله باقديرماز. ايشته بو حقيقته بناءً، دگل اون اوچ آى، بلكه اون اوچ سنه (حاشيه) دخى باقماسه‌م حقّم وار. سزلر باقديڭز. گناهلردن باشقه نه قزانديڭز؟ بن باقمادم، نه غائب ايتدم؟
    ايكنجى سؤال: إشاراتِ قرآنيه رساله‌سنده، فاتحه‌نڭ آخرنده صراطِ مستقيم أصحابى كه، {َالَّذِينَ اَنْعَمْتَ عَلَيْهِمْ} آيتيله تعريف ايديلن طائفه ايچنده، هم {لاَ تَزَالُ طَائِفَةٌ مِنْ اُمَّتِى} إلى آخر... حديثنڭ آخر زمانده گوستردكلرى مجاهدلر ايچنده و هم وَالْعَصْرِ سوره‌سنڭ {اِلاَّ الَّذِينَ اٰمَنُوا} دن باشلايان اوچ جمله‌نڭ معناىِ إشاريسنده خصوصى بر صورتده بر فردى، رسالۀِ النورڭ خاص شاكردلرى اولديغنه سبب نه‌در و وجهِ تخصيصى نه‌در؟
    الجواب: سببى ايسه؛ رسالۀِ النور، يوزه ياقين دين طلسملرينى و حقائقِ قرآنيه‌‌نڭ معمّالرينى حلّ و كشف ايتمشدر كه؛ هر بر طلسمڭ بيلينمه‌مسندن چوق إنسانلر شبهاته و شكوكه دوشوب، تردّدلردن قورتولامايوب، بعضًا ايماننى غائب ايدردى. شيمدى بتون دينسزلر طوپلانسه‌لر، او طلسملرڭ كشفندن صوڭره غلبه ايده‌مزلر. يگرمى سكزنجى مكتوبده‌كى عناياتِ سبعه‌ده بر قسمنه إشارت ايديلمش. إن شاء اﷲ بر زمان او طلسملر، مستقل بر رساله‌ده جمع ايديله‌جك.