بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ
    عزيز، صدّيق قارداشلرم!
    قهرمان طاهرى و حافظ مصطفى‌نڭ ياپدقلرى خدمت چوق گوزلدر. اونلرڭ تدبيرلرى إصابتليدر، حقدر. نور فابريقه‌سنڭ ديواننده ويرديگڭز قرارلر، نه اولورسه قبولمزدر. إشاراتِ قرآنيه توابعلريله برابر چوق گوزل. يالڭز سيّد شفيگه گيدن مكتوب، شخصنه عائد قسمى گيرميه‌جكدى. لاحقه‌دن آلديغڭز پارچه‌لر ده چوق گوزل. بيوك على سيستمنده، كوچك و ايكنجى علينڭ معنيدار فقره‌سى اييدر، فقط مختصردر. أڭ أوّل گنجلره عائد اوچ درت درسڭ كه، (حافظ مصطفى‌يه ويرمشدك) أل ماكينه‌سيله، ممكنسه أسكى حروفله، دگلسه يڭى حروفله (حاشيه) نور فابريقه‌سنڭ ديواننده‌كى هيئت مناسب گورسه و حال مساعده ايتسه، يازيلسين. بزه ده بعض نسخه‌لر گوندريلسين. مباركلرڭ إشارات الإعجازلرينه بدل بر نسخه‌مى پوسطه ايله گوندردك. جمعه گوننه راست گلن بو بايرام، چوق قيمتدار اولان حجّ الأكبر اولديغندن، حجّه بو سنه گيدنلر چوق قزانمشلر. جنابِ حق بزى ده اونلرڭ خيرلى دعالرينه حصّه‌دار أيله‌سين، آمين. تكرار بَتكرار او بايرامڭزى و عموم رسالۀِ النور شاكردلرينڭ بايراملرينى و نور و گل فابريقه‌لرينڭ هيئتلرينى و مدرسۀِ نوريه شاكردلرينڭ و استادلرينڭ و بارلا صديقلرينڭ و معصوملرڭ و اُمّى إختيارلرڭ، رجالاً و نساءً عمومنڭ برر برر بايراملرينى تبريك ايدييورز.
سعيد النورسى