بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
 اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ بِعَدَدِ حُرُوفِ مَاكَتَبْتُمْ وَطَبَعْتُمْ
    عزيز، صدّيق، مقتدر، متيقّظ قارداشلرم!
    سزڭ مبارك ليالئِ عشره‌ڭزى و قربان بايرامڭزى تبريك ايدرز. نور فابريقه‌سى صاحبى حافظ علينڭ حشرِ جسمانى حقّنده‌كى خاطرينه گلن مسئله أهمّيتليدر و مكتوبڭ آخرنده‌كى تمثيلى غايت گوزل و معنيداردر. او خاطره ايله طوقوزنجى شعاعڭ مقدّمۀِ حشريه‌دن صوڭره‌كى طوقوز برهانِ حشريه‌يى ايسته‌يور دييه آڭلادم. فقط مع التأسّف بر ايكى سنه‌در تأليف وظيفه‌سى توقّف ايتمش. رسائل النورڭ مسائلى؛ علم ايله، فكر ايله، نيت ايله و قصدى بر إختيارله دگل؛ أكثريتِ مطلقه ايله سنوحات، ظهورات، إخطارات ايله اولويور. بو طوقوز براهينه شيمدى إحتياجِ حقيقى قالمه‌مش كه، تأليفه سوق اولونمييورز.
    أوت أركانِ ايمانيه ايچنده ”ايمانِ بِاﷲ“ و ”ايمانِ بِاليوم الآخر“ عالمِ إسلاميتڭ ايكى قطبى و ايكى گونشيدر.
    برنجيسنى؛ رسالۀِ النور، تماميله برهانلرينى ايضاح ايتمش.
    ايكنجى قطب ايسه؛ قسمًا مستقل اولارق اوننجى سوز، يگرمى طوقوزنجى سوز، يگرمى سكزنجى سوز، خصوصًا جسمانى لذّتلرڭ إثباتنده و مقدّمۀِ حشريه گبى رساله‌لرده غايت قوّتلى حشرِ جسمانى‌يى إثبات ايتمش، معنّدلرى ده صوصديرمش. و ايمانِ بِاﷲ گبى، بو دنياده‌كى موجودات ظاهر بر صورتده اونى گوسترمديگندن قسمِ أكثريسى ايسه، سائر أركانِ ايمانيه ايچنده حشرى قوّتلى بر صورتده إثبات ايدر.
    أزجمله: قرآنِ معجز البيانڭ حقّانيتنى إثبات ايدن بتون حجّتلرى، ايكنجى درجه‌ده حشرِ جسمانى‌يى، بيڭلر آياتِ قرآنيه‌‌نڭ تصوير و ايضاحاتلريله إثبات ايدييور. عجبا، قرآنِ معجز البيانڭ معجزانه جنّتڭ لذائذِ جسمانيه‌سندن بحثلرى و ايضاحلرى درجه‌سندن داها باشقه بر ايضاحه لزوم قالير مى؟