هم بوندن اون درت، اون بش سنه أوّل، ”دينسزلگى چويرنلر مدهش سماوى طوقاتلر ييه‌جكلر“ دييه بيوك، گنيش، كُرۀِ أرض دائره‌سنده‌كى بو دهشتلى حادثه‌يى، طار بر مملكتده و محدود إنسانلرده تصوّر ايتمش. حالبوكه إستقبال، او ايكى إخبارِ غيبيه‌يى تصوّرينڭ پك فوقنده تفسير و تعبير أيلدى. أوت أسكى سعيدڭ ”بر نور عالمى گوره‌جگز“ ديمسى، رسالۀِ النور دائره‌سنڭ معناسنى حسّ ايتمش؛ گنيش بر دائرۀِ سياسيه تصوّر ايتديگى گبى، سرِّ إِنَّا اَعْطَيْنَانڭ رمزيله، اون اوچ اون درت سنه صوڭره، ”دينسزلگى، زنديقلغى نشر ايدنلر، پك مدهش طوقاتلر ييه‌جكلر.“ دييوب؛ او حقيقتى طار بر دائره‌ده تصوّر ايتمش. شيمدى زمان، او ايكى حقيقتى تام تعبير و تفسير ايتدى. أوت باشده إسپارطه ولايتى اولارق رسالۀِ النور دائره‌سى، برنجى حقيقتى پك پارلاق و گوزل بر صورتده گوسترديگى گبى؛ ايكنجى حقيقتى ده، مدنيتِ سفيهه‌نڭ طغياننى و مادّيونلق (حاشيه) طاعوننڭ آشيلامسنى چويرن و إداره ايدن أرواحِ خبيثه‌نڭ باشلرينه گلن بو دهشتلى سماوى طوقاتلر، گنيش بر دائره‌ده، او سرِّ إِنَّا اَعْطَيْنَانڭ حقيقتنى، تام تامنه إثبات ايتمش.
    رسالۀِ النور قطعى برهانلره إستنادًا حكملرى؛ سائر حقائقده عين عيننه، تأويلسز، تعبيرسز حقيقت چيقماسى و يالڭز إشاراتِ توافقيه و سنوحاتِ قلبيه‌يه إعتمادًا بياناتى، بويله دنيوى اولان مسائلِ إستقباليه‌ده نه‌دن بعضًا تعبير و تأويله محتاج اولويور؟ دييه خاطريمه گلدى.
    بويله بر جواب إخطار ايديلدى كه: غيبى إستقبالِ دنيوى‌ده و دنيا ايشلرنده باشه گلن حادثاتى بيلديرمه‌مكده؛ جنابِ أرحم الراحمينڭ چوق بيوك بر رحمتى صاقلانديغنى و غيبى گيزله‌مكده چوق أهمّيتلى بر حكمتى بولونديغى جهتله، غيبى شيلرى خبر ويرمكدن ياساق ايدوب، يالڭز مبهم و مجمل بر صورتده، يا إلهام ويا إخطار ايله بر أماره‌يى وسيله ايده‌رك، كشفياتده و رؤياىِ صادقه‌ده بر قسم غيبى حقيقتلرى إحساس ايدر. او حقيقتلرڭ خصوصى صورتلرى، وقوعندن صوڭره بيلينير