عزيز، صدّيق قارداشلرم!
    رسالۀِ النورڭ حقّانيتنه و أهمّيتنه دائر بر إمضاىِ غيبى حكمنده اولان يازديغڭز مجموعۀِ إشاراته، لاحقه‌دن إنتخاب ايتديگڭزدن ايكى مِثلى داها علاوه ايتدك. أگر سز ده كنديڭزه اويله بر مجموعه يازمشسه‌ڭز، علاوه ايتديگمز مقدارى سزه ده گوندره‌جگز. بو مجموعه‌نڭ گوسترديگى قيمت رسالۀِ النورده بولونديغنى، بو زمانڭ دهشتلى فورطنه‌لرى إثبات ايدييور.
    أوت قارداشلرم، حضرتِ عيسى عليه السلام إنجيلِ شريفده ديمش كه: ”بن گيدييورم، تا سزه تسلّيجى گلسين.“ يعنى أحمد عليه الصلاة والسلام گلسين، ديمه‌سيله قرآنڭ بشره غايت بيوك بر نتيجه‌سى، بر غايه‌سى، بر هديه‌سى؛ تسلّيسيدر.
    أوت بو دهشتلى كائناتڭ فورطنه‌لرى و زوال و تخريباتلرى ايچنده و بو بوشلق نهايتسز فضاده هر شى ايله علاقه‌دار اولان إنسان ايچون حقيقى تسلّى‌ىى و إستناد و إستمداد نقطه‌لرينى يالڭز قرآن ويرييور. أڭ زياده او تسلّى‌يه محتاج بو زمانده، بو عصرده أڭ زياده قوّتلى بر صورتده او تسلّى‌ىى إثبات ايدن، گوسترن رسالۀِ النوردر. چونكه ظلمات و أوهامڭ منبعى اولان طبيعتى، او دلمش گچمش، حقيقت نورينه گيرمش. اون آلتنجى سوز گبى أكثر پارچه‌لرنده، حقائقِ ايمانيه‌نڭ يوزر طلسملرينى كشف و ايضاح ايدوب، عقلى إنكاردن و تردّدلردن قورتارمش. ايشته بو حقيقت ايچوندر كه؛ بو چوق اوصانديريجى و دهشتلى زمانده، اوصانديرميه‌جق بر طرزده، چوق تكرار ايله برابر، عقلى باشنده اولانلرى رسالۀِ النورله مشغول ايدييور. رأفت بگڭ مكتوبنده ديديگى گبى، ”رسالۀِ النورڭ أڭ بارز خاصيتى، اوصانديرمامق. يوز دفعه اوقونسه، يوزبرنجى دفعه ينه ذوقله اوقونه‌بيلير“ دييه پك طوغرى ديمش.
    رسالۀِ النورڭ ترجمانى، حقيقى وظيفه‌سنڭ خارجنده دنياده‌كى إستقبالياته آرا صيره باقمسى، بر درجه ظاهرى بر مشوّشيت ويرر. مثلا: بوندن اوتوز قرق سنه أوّل دييوردى: ”بر نور گله‌جك، بر نورانى عالمى گوره‌جگز“ دييوب؛ او معنا، گنيش بر دائره‌ده و سياستده تصوّر ايديلمش.