رسالۀِ النورڭ أركانندن بريسى، قطعى بر صورتده خبر ويرييور كه: اوچ درت آدم، دنيا ثروتنڭ خاطرى ايچون طوپلانوب، منافقانه تدبير قوردقلرى هنگامده؛ اوچ گون صوڭره او اوچ درت آدمڭ خانه‌لرى و برينڭ دكّانى يانوب، هر برى بيڭلر ليرا ضايعاتله توقات ييديلر.
    هم بر دسّاس جاسوس آدم، رسالۀِ النور شاكردلرى عليهنده چاليشييوردى كه، اونلرى حپسه آتديرسين. بر گون (سربست اولارق) ”بن بر ايپ اوجى بولامادم كه، بونلرى حپسه صوقسه‌م. أگر بر ايپ اوجى بولسه‌م، اونلرى حپسه صوقاجغم.“ دييه إعلان ايتديگى وقتدن ايكى گون صوڭره بر ايش ياپوب، رسالۀِ النور شاكردلرى يرنده، او آدم ايكى سنه حپسه گيردى.
    هم بدبخت، معنّد بر آدم، رسالۀِ النور عليهنده هم شاكردلرينڭ بر ركنى عليهنده متجاوزانه بولونديغى هنگامده، بر ايكى گون صوڭره ميخانه‌يه گيدوب ايچه ايچه چاتلامش، اوراده ئولمش. بو نوعدن چوق حادثه‌لر وار. ديمك رسالۀِ النور دوستلره ترياق اولديغى گبى، دشمنلره ده صاعقه اولويور.
* * *
(رسالۀِ النور شاكردلرندن حافظ توفيق، محمد فيضى، أمين، حلمى، كاملڭ بر فقره‌سيدر)
    غوثِ أعظمڭ استاديمز حقّنده {فَاِنَّكَ مَحْرُوسٌ بِعَيْنِ الْعِنَايَةِ} فقره‌سيله، عنايت و تسهيله مظهر اولديغنه؛ و توافق، رسالۀِ النورڭ كرامتنڭ بر معدنى بولنديغنه پك چوق أماره‌لردن، بو بر ايكى گون ظرفنده، كوچك و لطيف، فقط قطعى قناعت ويرن جزئى حادثه‌لرڭ توافقنده گوزيمزله گورديگمز عنايتِ ربّانيه‌نڭ نمونه‌لرندن بش آلتيسنى بيان ايدييورز كه، اونلر بو ايكى گون ظرفنده برابر وقوع بولمش: