هم قهرمان طاهرڭ بڭا يازديغى مدافعات رساله‌سنده، إختيار لمعه‌سنده آنقره‌يه عائد بحثنده سكزنجى رجا يازمش. حالبوكه يدنجى رجادر. اونى ده تصحيح ايديڭز. طاهرى گبى قهرمان بر مخدومه صاحب اولان و خانه‌سنده رسالۀِ النورڭ آلتى شاكردى بولنان قارداشمز حسنى أفندى‌يه بِالمقابله سلام و تبريك ايدرز.
* * *
بِاسْمِهِ سُبْحَانَهُ  ❊  وَاِنْ مِنْ شَيْءٍ اِلاَّ يُسَبِّحُ بِحَمْدِهِ
    عزيز قارداشلرم!
    قرآنه عائد أڭ جزئى، أڭ كوچك بر نكته‌نڭ ده قيمتى بيوك اولديغندن؛ إشاراتِ قرآنيه‌‌نڭ بو زمانمزه تماس ايدن كوچك بر شعاعى بوگون سورۀِ وَالْعَصْرِ نكتۀِ إعجازيه‌سى مناسبتيله، سورۀِ فيلدن معناىِ إشارى طبقه‌سندن توافق دستورينه إستنادًا بر نكته‌سنى بيان ايتمه‌م إخطار ايديلدى. شويله كه:
    سورۀِ {اَلَمْ تَرَ كَيْفَ} مشهور و تاريخى بر حادثۀِ جزئيه‌يى بيان ايله، كلّى و هر عصرده أفرادى بولنان او گبى و اوڭا بڭزه‌ين حادثه‌لرى إخطار و طبقاتِ إشاريه‌دن هر طبقه‌يه گوره بر معنايى إفاده ايتمك، عموم عصرلرده عموم نوعِ بشرله قونوشان قرآنِ معجز البيانڭ بلاغتنڭ مقتضاسى اولماسندن، بو قدسى سوره بو عصريمزه ده باقييور، درس ويرييور، فنالرى توقاتلايور. معناىِ إشارى طبقه‌سنده، بو عصرڭ أڭ بيوك حادثه‌سنى خبر ويرمكله برابر؛ دنياىى هر جهتله دينه ترجيح ايتمك و ضلالتده گيتمه‌نڭ جزاسى اولارق، جفر و حسابِ أبجد ايله اوچ جمله‌سى، عين حادثه‌نڭ زماننه تطابق ايدوب إشارت ايدييور.