صورديغڭز ايكنجى جهت ايسه، حافظ مصطفى‌يه ويرديگم يڭى حروفله ايكى رساله، چوغى آيرى آيرى اولسون، بعض ده برابر اولسون. گنجلره عائد رساله‌جگڭ باشنده إسم اولارق ”سراج الغافلين“ وياخود ”گنجلك رهبرى“ نامى؛ توحيده عائد رساله‌يه ”حجّة اﷲ البالغه“ نامنى وياخود ”مصباح الايمان“؛ كرامت مجموعه‌سنڭ إسمى ايسه، ”سكّۀِ تصديقِ غيبى“ ويا ”تصديقِ غيبينڭ خاتمى“ نامنى باشنده يازارسڭز. عربى ”ورد الأكبرِ نوريه“ طبع ايديلمشسه، عربى بيلمه‌ين رسالۀِ النور شاكردلرينه بر تسهيلات اولمق ايچون يدنجى شعاع آيت الكبرا و يگرمنجى مكتوبده ايضاح و ترجمه ايديلن صحيفه‌لرينڭ نومرولرى، ورد الأكبرڭ كنارلرينه رقمله بر حاشيه‌جك گبى يازيلسه ايى اولور. يعنى ”بو عربى مقام، فلان رساله‌ده، فلان صحيفه‌ده ايضاحى وار“ دييه إشارت ايديلسه و ألماس قلملى قارداشلريمز بونى توزيع ايدوب، هر برى بعض نسخه‌لرى بويله إشارتلرله قيد ايتسه و هم أل ماكينه‌سيله ياپديغڭز ويا مطبعه‌دن گلن رساله‌لردن نمونه ايچون بر ايكى نسخه‌سنى بزه گوندرسه‌ڭز ايى اولور.
* * *
    عزيز، صدّيق قارداشلرم!
    بو شدّتلى مادّى و معنوى قيشده‌كى غلا و وارلق ايچنده قحط و دردِ معيشت فقرالره آغير باصماسى جهتنده، أكثرى فقير الحال اولان رسالۀِ النور شاكردلرينڭ بو دهشتلى حاله قارشى صارصيلمالرى و تساندلرى بوزولماسى إحتماليله زياده أنديشه ايدييوردم. سزلر هر زماندن زياده بو فورطنه‌ده تسانديڭزى و إتّحاديڭزى و بربرينڭ قصورينه باقمامسى، بربرينى تنقيد ايتمه‌مسى، رسالۀِ النورڭ وظيفۀِ قدسيۀِ ايمانيه‌سى حسابنه مكلّف و محتاجسڭز.