هم او ضرردندر كه، مبارك خسروڭ گلمسيله يڭى بر شوق و سرعتله بزه حزبِ نورى‌نڭ آرقه‌سنه إلحاق ايديلن مناجات پارچه‌سى اون بش گون تأخيره اوغرادى. اون بش گون أوّل بزه گله‌جگنى تخمين ايدييوردم. إنسان قصورسز اولماز و رقيبسز ده اولماز. رسالۀِ النورڭ قهرمان شاكردلرى هر مشكلاته غلبه ايتدكلرى گبى؛ إن شاء اﷲ بو أهمّيتلى و دهشتلى موسمده ينه غلبه ايدرلر. صفوت و إخلاصلرينى بوزميه‌جقلر و خدمتلرينه فتور گتيرميه‌جكلر. سز، تدبيرِ مادّّيه‌يى بندن داها ايى بيليرسڭز. فقط مادام خسروله رشدى، رسالۀِ النورده چوق أهمّيتلى ركنلردر. هم أطرافلرنده رسالۀِ النورڭ چوق أهمّيتلى شاكردلرى وار. و مادام حافظ على، طاهرى، حافظ مصطفى، كوچك على رسالۀِ النور خدمتنده تام موفّقيتلريله تام مقبول اولدقلرى تحقّق ايتمش. بو ايكى جريان باشده‌كى ايكى گوز گبى اولمالى. تام بر تساند لازم كه، بو آغير دفينه‌يه اوموزلرى طايانه‌بيلسىن.
    عموم قارداشلريمزه برر برر سلام ايدرز
* * *
    صاوه مدرسۀِ نوريه‌نڭ قيمتدار بر طلبه‌سى مرانغوز أحمدڭ گوزل و خالص منظومه‌سى بزى ممنون ايدوب، لاحقه‌يه گيردى. خصوصًا رسالۀِ النورڭ صاندالياسندن معصوملرى اينمديكلرى و ”او نورلى صاندالياده اوطوران، يانغينلر، طغيانلردن قورتولور.“ دييه سوزلرى گويا تام مدرسة الزهرانڭ حقيقى بر طلبه‌سى، إستقبالدن زمانمزه گلمش بزه تسلّى ويرييور و معصوم طلبه‌لرڭ چوغالماسنى مژده ويرييور.    رسالۀِ النورڭ تأليفى باشنده، باش كاتب شاملى حافظ توفيقڭ حرمى مرحومه زهرا، بن بارلاده ايكن، شاملى حافظ رسالۀِ النورى يازماسنه چاليشمق ايچون او مرحومه، حافظڭ بدلنه بلنده اودون طاشيمقله اودون گتيرييوردى و حافظڭ ايشلرينى گورويوردى.. تا نورلرى يازسين. بز ده او مرحومه‌يى او اييلگنه مقابل، رسالۀِ النورڭ وفات ايتمش خاص طلبه‌لرى ايچنده او وقتدن بَرى دعامزده شريك ايدييورز، هم دعا ايده‌جگز