سوزلر | اون اوچنجى سوز | 182
(182-215)
اون اوچنجى سوز

بِسْمِ اﷲِ الرَّحْمٰنِ الرَّحِيمِ

وَ نُنَزِّلُ مِنَ الْقُرْاٰنِ مَا هُوَ شِفَاءٌ وَ رَحْمَةٌ لِلْمُؤْمِنِينَ ❊

وَمَا عَلَّمْنَاهُ الشِّعْرَ وَمَا يَنْبَغِى لَهُ

قرآنِ حكيم ايله فلسفه علومنڭ محصولِ حكمتلرينى، درسِ عبرتلرينى، درجۀِ علملرينى موازنه ايتمك ايسترسه‌ڭ؛ شو گله‌جك سوزلره دقّت ايت!

ايشته قرآنِ معجز البيانڭ بتون كائناتده‌كى عاديات ناميله ياد اولنان، خارق العاده و برر معجزۀِ قدرت اولان موجودات اوستنده‌كى عادت و الفت پرده‌سنى كسكين بياناتيله ييرتوب، او حقائقِ عجيبه‌يى ذى‌شعوره آچوب، نظرِ عبرتلرينى جلب ايدوب، عقوله توكنمز بر خزينۀِ علوم آچار.

فلسفه حكمتى ايسه، بتون خارق العاده اولان معجزاتِ قدرتى، عادت پرده‌سى ايچنده صاقلايوب، جاهلانه و لاقيدانه اوستنده گچر. يالڭز خارق العاده‌لكدن دوشن و إنتظامِ خلقتدن خروج ايدن و كمالِ فطرتدن سقوط ايدن نادر فردلرى نظرِ دقّته عرض ايدر، اونلرى برر عبرتلى حكمت دييه ذى‌شعوره تقديم ايدر. مثلا: أڭ جامع بر معجزۀِ قدرت اولان إنسانڭ خلقتنى عادى دييوب لاقيدلقله باقار. فقط إنسانڭ كمالِ خلقتندن خروج ايتمش، اوچ آياقلى ياخود ايكى باشلى بر إنسانى بر ولولۀِ إستغرابله نظرِ عبرته تشهير ايدر. مثلا: أڭ لطيف و عمومى بر معجزۀِ رحمت اولان بتون ياورولرڭ خزينۀِ غيبدن منتظم إعاشه‌لرينى عادى گوروب، كفران پرده‌سنى اوستنه چكر. فقط إنتظامدن شذوذ ايتمش، قبيله‌سندن جدا اولمش، يالڭز اولارق غربته دوشمش، دڭزڭ آلتنده اولان بر بوجگڭ بر يشيل ياپراقله إعاشه‌سنى گورور، اوندن تجلّى ايدن لطف و كرمله حاضر باليقجيلرى آغلاتمق ايستر (حاشيه). ايشته قرآنِ كريمڭ علم و حكمت و معرفتِ إلٰهيه جهتيله ثروت و غناسى؛ و فلسفه‌نڭ علم و عبرت و معرفتِ صانع جهتنده‌كى فقر و إفلاسنى گور، عبرت آل!


-------------------------------------------------

  (حاشيه : آمريقاده عينًا بو واقعه اولمشدر

سس يوق

سوزلر