هم آيتِ {وَمَا يَنْبَغِى لَهُ} سرّينى ده بونڭله آڭلا كه: شعرڭ شأنى؛ كوچك و سونوك حقيقتلرى، بيوك و پارلاق خياللرله سوسلنديروب بگنديرمك ايستر. حالبوكه قرآنڭ حقيقتلرى؛ او قدر بيوك، عالى، پارلاق و رونقداردر كه، أڭ بيوك و پارلاق خيال، او حقيقتلره نسبت ايديلسه؛ غايت كوچك و سونوك قالير. مثلا: {يَوْمَ نَطْوِى السَّمَاءَ كَطَىِّ السِّجِلِّ لِلْكُتُبِ ❊ يُغْشِى الَّيْلَ النَّهَارَ يَطْلُبُهُ حَثِيثًا ❊ اِنْ كَانَتْ اِلاَّ صَيْحَةً وَاحِدَةً فَاِذَاهُمْ جَمِيعٌ لَدَيْنَا مُحْضَرُونَ} گبى حدسز حقيقتلرى بوڭا شاهددر.

قرآنڭ هر بر آيتى، برر نجمِ ثاقب گبى، إعجاز و هدايت نورينى نشر ايله كفرڭ ظلماتنى ناصل طاغيتديغنى گورمك، ذوق ايتمك ايسترسه‌ڭ؛ كندينى او عصرِ جاهليتده و او صحراىِ بدويتده فرض ايت كه، هر شى ظلمتِ جهل و غفلت آلتنده پردۀِ جمود و طبيعته صاريلمش اولديغى بر آنده، بردن قرآنڭ لسانِ علويه‌سندن {يُسَبِّحُ ِﷲِ مَا فِى السَّمٰوَاتِ وَمَا فِى اْلاَرْضِ الْمَلِكِ الْقُدُّوسِ الْعَزِيزِ الْحَكِيمِ} گبى آيتلرى ايشيت، باق. او ئولمش ويا ياتمش موجوداتِ عالم {يُسَبِّحُ} صداسيله ايشيدنلرڭ ذهننده ناصل ديريلييورلر، هشيار اولويورلر، قيام ايدوب ذكر ايدييورلر. هم او قراڭلق گوك يوزنده برر جامد آتش‌پاره اولان ييلديزلر و يرده‌كى پريشان مخلوقات، {تُسَبِّحُ لَهُ السَّمٰوَاتُ السَّبْعُ وَ اْلاَرْضُ} صيحه‌سيله ايشيدنلرڭ نظرنده؛ گوك يوزى بر آغز، بتون ييلديزلر برر كلمۀِ حكمت‌نما، برر نورِ حقيقت‌أدا؛ و أرض بر قفا؛ برّ و بحر برر لسان؛ و بتون حيوانات و نباتات برر كلمۀِ تسبيح‌فشان صورتنده عرضِ ديدار ايدر. يوقسه بو زماندن تا او زمانه باقمقله، مذكور ذوقڭ دقائقنى گوره‌مزسڭ. أوت او زماندن بَرى نورينى نشر ايدن و مرورِ زمان ايله علومِ متعارفه حكمنه گچن و سائر نيّراتِ إسلاميه ايله پارلايان و قرآنڭ گونشيله گوندوز رنگنى آلان بر وضعيت ايله ياخود سطحى و بسيط بر پردۀِ الفت ايله باقسه‌ڭ، ألبته هر بر آيتڭ نه قدر طاتلى بر زمزمۀِ إعجاز ايچنده نه چشيد ظلماتى طاغيتديغنى حقّيله گوره‌مزسڭ و بر چوق أنواعِ إعجازى ايچنده بو نوعِ إعجازينى ذوق ايده‌مزسڭ. قرآنِ معجز البيانڭ أڭ يوكسك بر درجۀِ إعجازينه باقمق ايسترسه‌ڭ، شو تمثيلى ديڭله، باق. شويله كه: