سوزلر | اون اوچنجى سوز | 215
(182-215)

ايشته هوا عنصرينڭ يالڭز نقلِ أصوات وظيفه‌سنده مذكور جلوۀِ وحدانيتى و مذكور عجائبى گوسترديگى و ضلالتڭ حدسز محاليتنى إظهار ايتديگى گبى، عنصرِ هوائينڭ سائر أهمّيتلى وظيفه‌لرندن برى ده ألكتريق، جاذبه، دافعه، ضيا گبى سائر لطائفڭ نقلنده شاشيرمادن منتظمًا، أصوات نقلنده‌كى وظيفه‌يى گورديگى عين زمانده، بو وظيفه‌لرى دخى گورديگى عين زماننده، بتون نباتات و حيواناته تنفّس و تلقيح گبى حياته لزومى بولونان لوازماتى كمالِ إنتظام ايله يتيشديرييور. أمر و إرادۀِ إلٰهيه‌نڭ بر عرشى اولديغنى قطعى بر صورتده إثبات ايدييور. و سرسرى تصادف و كور قوّت و صاغير طبيعت و قاريشق، هدفسز أسباب و عاجز، جامد، جاهل مادّه‌لر بو صحيفۀِ هوائيه‌نڭ كتابتنه و وظيفه‌لرينه قاريشماسى هيچ بر جهتله إحتمال و إمكانى بولونماديغنى عين اليقين درجه‌سنده إثبات ايتديگنى قطعى قناعت گتيردم و هر بر ذرّه و هر بر پارچه لسانِ حال ايله {لاَ اِلٰهَ اِلاَّ هُوَ} و {قُلْ هُوَ اﷲُ اَحَدٌ} ديديكلرينى بيلدم و بو {هُوَ} آناختارى ايله هوانڭ مادّى جهتنده‌كى بو عجائبى گورديگم گبى، هوا عنصرى ده بر {هُوَ} اولارق عالمِ مثال و عالمِ معنايه بر آناختار اولدى.


متباقيسى شيمديلك يازديريلمادى. عمومه بيڭلر سلام

سس يوق

سوزلر