(شعاعاتِ معرفة النبى نامنده‌كى توركجه بر رساله‌ده و اون طوقوزنجى مكتوبده و شو سوزده إجمالاً إشارت ايتديگمز دلائلِ نبوّتِ أحمديه‌يى (ع‌ص‌م) بيان ايتمشم. هم اونده قرآنِ حكيمڭ وجوهِ إعجازى إجمالاً ذكر ايديلمش. ينه ”لمعات“ نامنده توركجه بر رساله‌ده و يگرمى بشنجى سوزده قرآنڭ قرق وجهله معجزه اولديغنى إجمالاً بيان و قرق وجوهِ إعجازينه إشارت ايتمشم. او قرق وجهده، يالڭز نظمده اولان بلاغتى، ”إشارات الإعجاز“ نامنده‌كى بر تفسيرِ عربى‌ده قرق صحيفه ايچنده يازمشم. أگر إحتياجڭ وارسه شو اوچ كتابه مراجعت ايده‌بيليرسڭ.)

اون دردنجى رشحه: مخزنِ معجزات و معجزۀِ كبرا اولان قرآنِ حكيم؛ نبوّتِ أحمديه (ع‌ص‌م) ايله وحدانيتِ إلٰهيه‌يى، او درجه قطعى إثبات ايدييور كه، باشقه برهانه حاجت بيراقمييور. بز ده اونڭ تعريفنه و مدارِ تنقيد اولمش بر ايكى لمعۀِ إعجازينه إشارت ايدرز.

ايشته ربّمزى بزه تعريف ايدن قرآنِ حكيم؛ شو كتابِ كبيرِ كائناتڭ بر ترجمۀِ أزليه‌سى... شو صحائفِ أرض و سماده مستتر كنوزِ أسماءِ إلٰهيه‌نڭ كشّافى... شو سطورِ حادثاتڭ آلتنده مضمر حقائقڭ مفتاحى... شو عالمِ شهادت پرده‌سى آرقه‌سنده‌كى عالمِ غيب جهتندن گلن إلتفاتاتِ رحمانيه و خطاباتِ أزليه‌نڭ خزينه‌سى... شو عالمِ معنويۀِ إسلاميه‌نڭ گونشى، تملى، هندسه‌سى... عوالمِ اُخرويه‌نڭ خريطه‌سى... ذات و صفات و شئونِ إلٰهيه‌نڭ قَولِ شارحى، تفسيرِ واضحى، برهانِ ناطقى، ترجمانِ ساطعى... شو عالمِ إنسانيتڭ مربّيسى، حكمتِ حقيقيسى، مرشد و هاديسى... هم بر كتابِ حكمت و شريعت، هم بر كتابِ دعا و عبوديت، هم بر كتابِ أمر و دعوت، هم بر كتابِ ذكر و معرفت گبى؛ بتون حاجاتِ معنويه‌سنه قارشى برر كتاب و بتون مختلف أهلِ مسالك و مشارب اولان أوليا و صدّيقينڭ، أصفيا و محقّقينڭ (هر برينڭ) مشربلرينه لايق برر رساله إبراز ايدن بر ”كتبخانۀِ مقدّسه“در.