ايشته شو يوقاريده گچن اون ايكى آيرى آيرى پنجره‌لردن، اون ايكى وجهدن بر پنجرۀِ أعظم آچيلييور كه؛ اون ايكى رنكلى بر ضياىِ حقيقت ايله جنابِ حقّڭ أحديتنى و وحدانيتنى و كمالِ ربوبيتنى گوسترر.

ايشته أى بدبخت منكِر! شو دائرۀِ أرض قدر، بلكه مدارِ سنويسى قدر گنيش اولان شو پنجره‌يى نه ايله قپاته‌بيليرسڭ؟ و گونش گبى پارلاق اولان شو معدنِ نورى نه ايله سوندوره‌بيليرسڭ و هانگى پردۀِ غفلتده صاقلايه‌بيليرسڭ؟...

شو كائنات يوزنده سرپيلن مصنوعاتڭ كمالِ إنتظاملرى و كمالِ موزونيتلرى و كمالِ زينتلرى و ايجادلرينڭ سهولتى و بربرينه بڭزه‌مه‌لرى و بر تك فطرت إظهار ايتمه‌لرى، ناصلكه بر صانعِ حكيمڭ وجوبِ وجودينى و كمالِ قدرتنى و وحدتنى غايت گنيش بر مقياسده گوسترييورلر. اويله ده: جامد و بسيط عنصرلردن، حدسز و آيرى آيرى و منتظم مركّباتڭ ايجادى، مركّبات عددنجه ينه او صانعِ حكيمڭ وجوبِ وجودينه شهادت و وحدتنه إشارت ايتمكله برابر، هيئتِ مجموعه‌سيله غايت پارلاق بر طرزده كمالِ قدرتنى و وحدتنى گوسترديگى گبى تركيباتِ موجودات تعبير ايديلن تركيب و تحليل هنگامنده‌كى تجدّدده نهايت درجه‌ده إختلاط و قاريشمه ايچنده نهايت درجه‌ده بر إمتياز و تفريق ايله، مثلا طوپراقده‌كى تخملرڭ و كوكلرڭ چوق قاريشق اولديغى حالده هيچ شاشيرميه‌رق بر صورتده سنبللرينى و وجودلرينى تمييز و تفريق ايتمك و آغاجلره گيرن قاريشق مادّه‌لرى ياپراق و چيچك و ميوه‌لره تفريق ايتمك و حجيراتِ بدنه قاريشق بر صورتده گيدن غدائى مادّه‌لرى كمالِ حكمتله و كمالِ ميزانله آييروب تفريق ايتمك، ينه او حكيمِ مطلق و او عليمِ مطلق و او قديرِ مطلقڭ وجوبِ وجودينى و كمالِ قدرتنى و وحدتنى گوسترديگى گبى؛ ذرّه‌لر عالمنى حدسز و گنيش بر تارلا حكمنه گتيروب، هر دقيقه‌ده كمالِ حكمتله أكوب بيچوب، يڭى يڭى كائناتلر محصولاتنى اوندن آلمق و او جامده، عاجزه، جاهله اولان ذرّاته غايت شعوركارانه و غايت حكيمانه و مقتدرانه حدسز منتظم وظيفه‌لرى گورديرمك، ينه او قديرِ ذو الجلالڭ و او صانعِ ذو الكمالڭ وجوبِ وجودينى و كمالِ قدرتنى و عظمتِ ربوبيتنى و وحدتنى و كمالِ ربوبيتنى گوسترر.