ايشته بويله بر سلطانه عبوديت و ايمانله إنتساب ايتمك و شو دنياده اوڭا مسافر اولمق نه قدر عالى بر سعادت، نه درجه بيوك بر شرف اولديغنى قياس ايت.

صوڭره قمره باقدم. {وَ الْقَمَرَ قَدَّرْنَاهُ مَنَازِلَ حَتّٰى عَادَ كَالْعُرْجُونِ الْقَدِيمِ} آيتنڭ غايت پارلاق بر نورِ إعجازى إفاده ايتديگنى گوردم. أوت قمرڭ تقديرى و تدويرى و تدبير و تنويرى و زمينه و گونشه قارشى غايت دقيق بر حسابله وضعيتلرى، او قدر حيرت‌فزا، او درجه خارقه‌در كه، اونى اويله تنظيم ايدن و تقدير ايدن بر قديره هيچ بر شى آغير گلمز. ”اونى اويله ياپان هر شيئى ياپابيلير“ فكرينى، تماشا ايدن هر بر ذى‌شعوره درس ويرر. هم اويله بر طرزده گونشى تعقيب ايدييور كه؛ بر ثانيه قدر يولنى شاشيرمييور، ذرّه قدر وظيفه‌سندن گرى قالمييور. دقّتله باقانه: {سُبْحَانَ مَنْ تَحَيَّرَ فِى صُنْعِهِ الْعُقُولُ} ديديرتييور. خصوصًا مايسڭ آخرنده اولديغى گبى، بعض وقتده اينجه هلال شكلنده ثريّا منزلنه گيرديگى وقت، خرما آغاجنڭ أگيلمش بياض بر دالى صورتنى و ثريّا بر صالقيم صورتنى گوسترديگندن، او يشيل سما پرده‌سى آرقه‌سنده، خياله نورانى بيوك بر آغاجڭ وجودينى تخيّل ايتديرر. گويا او آغاجدن بر دالنڭ بر سيورى اوجى، او پرده‌يى دلمش، بر صالقيميله برابر باشنى چيقارمش، ثريّا و هلال اولمش و سائر ييلديزلر ده او غيبى آغاجڭ ميوه‌لرى اولديغنى خياله تلقين ايدر. ايشته {كَالْعُرْجُونِ الْقَدِيمِ} تشبيهنڭ لطافتنى، بلاغتنى گور.