مكتوبات | اون طوقوزنجى مكتوب | 143
(128-315)

ايشته بونڭ گبى رسولِ أكرم عليه الصلاة والسلامڭ بشريتى؛ او چكردگه، او يمورطه‌يه بڭزر. و وظيفۀِ رسالتله پارلايان ماهيتى ايسه، شجرۀِ طوبٰى گبى و جنّتڭ طيرِ همايونى گبيدر. هم دائما تكمّلده‌در. اونڭ ايچون چارشو ايچنده بر بدوى ايله نزاع ايدن او ذاتى دوشونديگى وقت؛ رفرفه بينوب، جبرائيلى آرقه‌ده بيراقوب، قاب قوسَيْنه قوشوب گيدن ذاتِ نورانيسنه، خيال گوزينى قالديروب باقمق لازم گلير. يوقسه يا حرمتسزلك ايده‌جك ويا نفسِ أمّاره‌سى اينانميه‌جق.


بشنجى نكته‌لى إشارت: امورِ غيبيه‌يه دائر حديثلرڭ بر قاچ مثالنى ذكر ايدرز:


رسولِ أكرم عليه الصلاة والسلام، نقلِ صحيح ايله و متواتر بر درجه‌ده بزه واصل اولمش كه؛ منبر اوستنده، جماعتِ صحابه ايچنده فرمان ايتمش كه:


{اِبْنِى حَسَنٌ هٰذَا سَيِّدٌ سَيُصْلِحُ اﷲُ بِهِ بَيْنَ فِئَتَيْنِ عَظِيمَتَيْنِ}


ايشته قرق سنه صوڭره إسلامڭ أڭ بيوك ايكى اوردوسى قارشى قارشى‌يه گلديگى وقت، حضرتِ حسن رضى اﷲ عنه، حضرتِ معاويه (رض) ايله مصالحه ايدوب، جدِّ أمجدينڭ معجزۀِ غيبيه‌سنى تصديق ايتمشدر.


ايكنجيسى: نقلِ صحيح ايله حضرتِ على‌يه ديمش:


{سَتُقَاتِلُ النَّاكِثِينَ وَ الْقَاسِطِينَ وَ الْمَارِقِينَ}


هم وقعۀِ جمل، هم وقعۀِ صفّين، هم وقعۀِ خوارج حادثه‌لرينى خبر ويرمش.


هم حضرتِ على (رض) حضرتِ زبير ايله سَويشديگى بر زمان ديدى: ”بو سڭا قارشى محاربه ايده‌جك، فقط حقسزدر.“

سس يوق

مكتوبات