هم صحابه‌لر، قرآنڭ و آيتلرڭ حفظندن صوڭره أڭ زياده، رسولِ أكرم عليه الصلاة والسلامڭ أفعال و أقوالنڭ محافظه‌سنه، باخصوص أحكامه و معجزاته دائر أحوالنه بتون قوّتلريله چاليشدقلرينى و صحّتلرينه پك چوق دقّت ايتدكلرينى، تاريخ و سِيَر شهادت ايدييور. رسولِ أكرم عليه الصلاة والسلامه عائد أڭ كوچك بر حركتى، بر سيرتى، بر حالى إهمال ايتمه‌مشلر. و ايتمدكلرينى و قيد ايتدكلرينى، كتبِ أحاديثيه شهادت ايدييور. هم عصرِ سعادتده، معجزاتى و مدارِ أحكام أحاديثى، كتابتله چوقلر قيد ايدوب يازديلر. خصوصًا عَباَدِلَۀِ سبعه، كتابتله قيد ايتديلر. خصوصًا ترجمانُ القرآن اولان عبد اﷲ ابن عبّاس و عبد اﷲ ابن عَمْر ابن العاص، باخصوص اوتوز قرق سنه صوڭره، تابعينڭ بيڭلر محقّقلرى، أحاديثى و معجزاتى يازى ايله قيد ايتديلر. داها اوندن صوڭره، باشده درت إمامِ مجتهد و بيڭلر محقّق محدّثلر نقل ايتديلر؛ يازى ايله محافظه ايتديلر. داها هجرتدن ايكى يوز سنه صوڭره باشده بخارى، مسلم، كتبِ ستّۀِ مقبوله وظيفۀِ حفظى اوموزلرينه آلديلر. ابن جوزى گبى شدّتلى بيڭلر منقّدلر چيقوب؛ بعض ملحدلرڭ ويا فكرسز ويا حفظسز ويا نادانلرڭ قاريشديردقلرى موضوع أحاديثى تفريق ايتديلر، گوسترديلر. صوڭره أهلِ كشفڭ تصديقيله؛ يتمش دفعه رسولِ أكرم عليه الصلاة والسلام تمثّل ايدوب، يقظه حالنده اونڭ صحبتيله مشرّف اولان جلال الدينِ سيوطى گبى علاّمه‌لر و محقّقلر، أحاديثِ صحيحه‌نڭ ألماسلرينى، سائر سوزلردن و موضوعاتدن تفريق ايتديلر. ايشته بحث ايده‌جگمز حادثه‌لر، معجزه‌لر بويله ألدن أله (قوّتلى، أمين، متعدّد و چوق، بلكه حدسز أللردن) صاغلام اولارق بزه گلمش. {اَلْحَمْدُ ِﷲِ هٰذَا مِنْ فَضْلِ رَبِّى}

ايشته بوڭا بناءً؛ ”بو زمانه قدر اوزون مسافه‌دن گلن شو زماندن تا او زمانه قدر بو حادثه‌لرى ناصل بيله‌جگز كه قاريشمامش و صافيدر“ خاطره گلمه‌مليدر.