ايكنجى شعبه‌: جنازه‌لرڭ و جنلرڭ و ملائكه‌لرڭ، رسولِ أكرم عليه الصلاة والسلامى طانيمالريدر. بونڭ ده چوق حادثه‌لرى وار. نمونه ايچون، شهرت بولمش و موثوق إماملر خبر ويرمش بر قاچ نمونه‌يى، أوّلا جنازه‌لردن گوستره‌جگز. امّا جنّ و ملائكه ايسه، او متواتردر.. اونلرڭ مثاللرى بر دگل، بيڭدر. ايشته ئولولرڭ قونوشماسى مثاللرندن:

برنجيسى شودر كه: علماءِ ظاهر و باطنڭ، تابعين زماننده أڭ بيوك رئيسى و إمامِ على‌نڭ مهمّ و صادق بر شاكردى اولان حسنِ بصرى خبر ويرييور كه: بر آدم، رسولِ أكرم عليه الصلاة والسلامڭ ياننه گله‌رك آغلايوب صيزلادى. ديدى: ”بنم كوچك بر قيزم واردى، شو ياقين دره‌ده ئولدى، اورايه آتدم.“ رسولِ أكرم عليه الصلاة والسلام اوڭا آجيدى. اوڭا ديدى: ”گل اورايه گيده‌جگز.“ گيتديلر. رسولِ أكرم عليه الصلاة والسلام او ئولمش قيزى چاغيردى: ”يا فلانه!“ ديدى. بردن او ئولمش قيز، ”لبّيك و سَعْدَيْكَ“ ديدى. رسولِ أكرم عليه الصلاة والسلام فرمان ايتدى: ”تكرار پدر و والده‌نڭ ياننه گلمگى آرزو ايدر ميسڭ؟“ او ديدى: ”يوق، بن اونلردن داها خيرليسنى بولدم.“

ايكنجيسى: إمامِ بيهقى و إمامِ ابن عدىّ گبى بعض مهمّ إماملر، حضرتِ أنس ابن مالكدن خبر ويرييورلر كه: أنس ديمش: بر إختياره قادينڭ بر تك اوغلى واردى، بردن وفات ايتدى. او صالحه قادين چوق متأثّر اولدى، ديدى: ”يا ربّ! سنڭ رضاڭ ايچون، رسولِ أكرم عليه الصلاة والسلامڭ بيعتى و خدمتى ايچون هجرت ايدوب بورايه گلدم. بنم حياتمده إستراحتمى تأمين ايده‌جك تك أولادجغمى، او رسولڭ حرمتنه باغيشلا.“ أنس دير: او ئولمش آدم قالقدى، بزمله يمك يدى.