امّا ملائكه‌لرڭ، رسولِ أكرم عليه الصلاة والسلامه خدمتى و گورونمسى و جنّيلرڭ اوڭا ايمان و إطاعتى، متواتردر. نصِّ قرآن و چوق آياتله مصرّحدر. غزوۀِ بدرده بش بيڭ ملائكه، (نصِّ قرآن ايله) اوڭده، صحابه‌لر گبى اوڭا خدمت ايدوب، عسكر اولمشلر. حتّى او مَلكلر، ملائكه‌لر ايچنده، أصحابِ بدر گبى شرف قزانمشلر. شو مسئله‌ده ايكى جهت وار:

بريسى: جنّ و ملائكه‌نڭ طائفه‌لرى، حيوان و إنسانڭ طائفه‌لرى گبى، وجودلرى قطعى و بزمله مناسبتدار اولديغى، يگرمى طوقوزنجى سوزده ايكى كرّه ايكى درت ايدر درجه‌سنده بر قطعيتله إثبات ايتمشز. اونلرڭ إثباتنى، او سوزه حواله ايدرز.

ايكنجى جهت: رسولِ أكرم عليه الصلاة والسلامڭ شرفيله، أثرِ معجزه‌سى اولارق، أفرادِ اُمّتى اونلرى گورمك و قونوشمقدر. ايشته باشده بخارى و إمامِ مسلم، أئمّۀِ حديث متّفقًا خبر ويرييورلر كه: بر دفعه مَلك يعنى حضرتِ جبرائيل، بياض لباسلى بر إنسان صورتنده گلمش. رسولِ أكرم عليه الصلاة والسلام صحابه‌لرى ايچنده اوطوروركن، ياننه گيتمش، ديمش: {مَا اْلاِسْلاَمُ وَمَا اْلاِيمَانُ وَمَا اْلاِحْسَانُ} يعنى: ”ايمان، إسلام، إحسان نه‌در؟ تعريف ايت.“ رسولِ أكرم عليه الصلاة والسلام تعريف ايتمش. اوراده‌كى جماعتِ صحابه هم درس آلمش، هم ده او ذاتى ايى گورمشلر. او ذات مسافر گبى گورونوركن، اوستنده علامتِ سفر أثرى هيچ يوقدى. قالقدى، بردن غائب اولدى. او وقت رسولِ أكرم عليه الصلاة والسلام فرمان ايتمش كه: ”سزه درس ويرمك ايچون جبرائيل بويله ياپدى.“

هم خبرِ صحيح ايله و خبرِ قطعى ايله و معنوى تواتر درجه‌سنده، أئمّۀِ حديث خبر ويرييورلر كه: ”حضرتِ جبرائيلى چوق دفعه، حسن و جمال صاحبى اولان دحيه صورتنده، رسولِ أكرم عليه الصلاة والسلامڭ ياننده صحابه‌لر گورويورلردى. أزجمله، حضرتِ عُمَر و ابن عبّاس و اُسامه ابن زيد و حارث و عائشۀِ صدّيقه و اُمُّ سلمه، قطعيًا ثابتدر كه، بونلر قطعيًا خبر ويرييورلر كه: بز حضرتِ جبرائيلى دحيه صورتنده، رسولِ أكرم عليه الصلاة والسلامڭ ياننده چوق گورويورز. عجبا هيچ ممكن ميدر كه، بو ذاتلر، گورمه‌دن گورويورز ديسينلر؟