هم مشهوردر و حديث إماملرى تخريج و قبول ايتدكلرى حضرتِ خالد ابن وليد وقعه‌سيدر كه: عُزَّا دينيلن صنمى تخريب ايتدكلرى وقت، سياه بر قادين شكلنده، او صنم ايچندن بر جنّيه چيقدى. حضرتِ خالد، بر قلنج ايله او جنّيه‌يى ايكى پارچه ايتدى. رسولِ أكرم عليه الصلاة والسلام، او حادثه ايچون فرمان ايتمش كه: ”عُزَّا صنمى ايچنده اوڭا عبادت ايديلييوردى، داها اوڭا عبادت ايديلمز.“

هم حضرتِ عُمَردن مشهور بر خبردر كه، ديمش: ”بز رسولِ أكرم عليه الصلاة والسلامڭ ياننده ايكن، إختيار شكلنده، ألنده بر عصا، ”هامه“ إسمنده بر جنّّى گلدى، ايمان ايتدى. رسولِ أكرم عليه الصلاة والسلام اوڭا قيصه سوره‌لردن بر قاچ سوره‌يى درس ويردى. درسنى آلدى، گيتدى. شو آخركى حادثه‌يه، چندان بعض حديث إماملرى ايليشمشلر؛ فقط مهمّ إماملر، صحّتنه حكم ايتمشلر. هر نه ايسه، بو نوعده اوزون سويله‌مگه لزوم يوق؛ مثاللرى چوقدر.

هم ديرز كه:

رسولِ أكرم عليه الصلاة والسلامڭ نوريله، تربيه‌سيله و اونڭ آرقه‌سنده گيتمه‌سيله، بيڭلر شيخِ گيلانى گبى أقطابلر، أصفيالر، ملائكه‌لر و جنلر ايله گوروشمشلر و قونوشويورلر و بو حادثه، يوز تواتر درجه‌سنده و چوق كثرتده‌در. أوت اُمّتِ محمّدڭ (ع‌ص‌م) ملائكه و جنلرله تماسلرى و تكلّملرى ايسه، رسولِ أكرم عليه الصلاة والسلامڭ تربيه و إرشادِ إعجازكارانه‌سنڭ بر أثريدر.

اوچنجى شعبه‌: رسولِ أكرم عليه الصلاة والسلامڭ حفظى و عصمتى، بر معجزۀِ باهره‌در. {وَ اﷲُ يَعْصِمُكَ مِنَ النَّاسِ} آيتِ كريمه‌سنڭ حقيقتِ باهره‌سى، چوق معجزاتى گوسترر. أوت رسولِ أكرم عليه الصلاة والسلام چيقديغى وقت، دگل يالڭز بر طائفه‌يه، بر قَومه، بر قسم أهلِ سياسته ويا بر دينه؛ بلكه عموم پادشاهلره و عموم أهلِ دينه تك باشيله ميدان اوقودى. حالبوكه اونڭ عموجه‌سى أڭ بيوك دشمن و قوم و قبيله‌سى دشمن ايكن؛ يگرمى اوچ سنه نوبتدارسز، تكلّفسز، محافظه‌سز و پك چوق دفعه سوءِ قصده معروض قالديغى حالده، كمالِ سعادتله، راحت دوشگنده وفات ايدوب، ملأِ أعلايه چيقماسنه قدر حفظ و عصمتى، {وَ اﷲُ يَعْصِمُكَ مِنَ النَّاسِ} نه قدر قوّتلى بر حقيقتى إفاده ايتديگنى و نه قدر متين بر نقطۀِ إستناد اولديغنى، گونش گبى گوسترر. بز يالڭز نمونه ايچون، قطعيت كسب ايتمش بر قاچ حادثه‌يى ذكر ايده‌جگز: