هم شو حادثه گبى، غزوۀِ بدرده بر منافق، رسولِ أكرم عليه الصلاة والسلامى بر غفلت وقتنده كيمسه گورمه‌دن، تام آرقه‌سندن قلنج قالديروب ووروركن، بردن رسولِ أكرم عليه الصلاة والسلام باقمش. او تيتره‌يوب، قلنج ألندن يره دوشمش.

دردنجى حادثه: معنوى تواتره ياقين بر شهرتله و أكثر أهلِ تفسيرڭ

{اِنَّا جَعَلْنَا فِى اَعْنَاقِهِمْ اَغْلاَلاً فَهِىَ اِلَى اْلاَذْقَانِ فَهُمْ مُقْمَحُونَ ❊ وَ جَعَلْنَا مِنْ بَيْنِ اَيْدِيهِمْ سَدًّا وَ مِنْ خَلْفِهِمْ سَدًّا فَاَغْشَيْنَاهُمْ فَهُمْ لاَ يُبْصِرُونَ} آيتنڭ سببِ نزولى و أهلِ تفسير علاّمه‌لرى و أهلِ حديث إماملرى خبر ويرييورلر كه: أبو جهل يمين ايتمش كه: ”بن سجده‌ده محمّدى گورسه‌م، بو طاشله اونى ووره‌جغم.“ بيوك بر طاش آلوب گيتمش. سجده‌ده گورديگى وقت قالديروب وورمقده ايكن، أللرى يوقاريده قالمش. رسولِ أكرم عليه الصلاة والسلام نمازى بيتيردكدن صوڭره قالقمش، أبو جهلڭ ألى چوزلمش. او ايسه؛ يا رسولِ أكرم عليه الصلاة والسلامڭ مساعده‌سيله وياخود إحتياج قالماديغندن چوزلمش.

هم ينه أبو جهل قبيله‌سندن (بر طريقده) وليد ابن مُغيره، ينه رسولِ أكرم عليه الصلاة والسلامى وورمق ايچون، بيوك بر طاشى آلوب سجده‌ده ايكن وورمغه گيتمش؛ گوزى قپانمش. رسولِ أكرم عليه الصلاة والسلامى مسجدِ حرامده گورمدى، گلدى. اونى گوندرنلرى ده گورمييوردى، يالڭز سسلرينى ايشيدييوردى. تا رسولِ أكرم عليه الصلاة والسلام نمازدن چيقدى، إحتياج قالماديغندن اونڭ گوزى ده آچيلدى.