هم نقلِ صحيح ايله أبو بكرِ الصدّيقدن خبر ويرييورلر كه: سورۀِ {تَبَّتْ يَدَا اَبِى لَهَبٍ} نازل اولدقدن صوڭره، أبو لهبڭ قاريسى اُمُّ جميل دينيلن ”حَمَّالَةَ الحَطَب“ بر طاش آلوب، مسجدِ حرامه گلمش. أبو بكر ايله رسولِ أكرم عليه الصلاة والسلام اوراده اوطورويورلرمش. گوزى أبو بكرِ الصدّيقى گورويور، صورويور: ”يا أبا بكر! سنڭ آرقداشڭ نره‌ده؟ بن ايشيتمشم كه، بنى هجو ايتمش. بن گورسه‌م، بو طاشى آغزينه ووره‌جغم.“ ياننده ايكن حضرتِ پيغمبر عليه الصلاة والسلامى گورمه‌مش. ألبته حفظِ إلٰهيده اولان بر سلطانِ لولاكى، بويله بر جهنّم اودونجيسى، اونڭ حضورينه گيروب گوره‌مز. آغزينه مى دوشمش!..

بشنجى حادثه: خبرِ صحيح ايله خبر ويريلييور كه: عامر ابن طُفَيل و اَرْبَدْ ابن قيس ايكيسى إتّفاق ايده‌رك رسولِ أكرم عليه الصلاة والسلامڭ ياننه گيتمشلر. عامر ديمش: ”بن اونى مشغول ايده‌جگم، سن اونى ووراجقسڭ!“ صوڭره باقييور كه، بر شى ياپمييور. گيتدكدن صوڭره آرقداشنه ديدى: ”نه‌دن وورمدڭ؟“ ديدى: ”ناصل ووره‌جغم، نه قدر نيّت ايتدم، باقييورم كه، ايكيمزڭ اورته‌سنه سن گچييورسڭ. سنى ناصل ووره‌جغم؟“

آلتنجى حادثه: نقلِ صحيح ايله خبر ويريلييور كه: غزوۀِ اُحُدده ويا حنين‌ده شيبه ابن عثمان الحجبى (كه، حضرتِ حمزه، اونڭ هم عموجه‌سنى، هم پدرينى ئولديرمشدى) إنتقامنى آلمق ايچون گيزلى گلدى. تا رسولِ أكرم عليه الصلاة والسلامڭ آرقه‌سندن يالين قلنج قالديردى. بردن قلنج ألندن دوشدى. رسولِ أكرم عليه الصلاة والسلام اوڭا باقدى، ألنى گوگسنه قويدى. شيبه دير كه: ”او دقيقه‌ده دنياده اوندن داها سَوْگيلى آدم بڭا اولمازدى.“ ايمانه گلدى. رسولِ أكرم عليه الصلاة والسلام فرمان ايتدى: ”هايدى گيت، حرب ايت!“ شيبه ديدى: ”بن گيتدم، رسولِ أكرم عليه الصلاة والسلام اوڭنده حرب ايتدم. أگر او وقت پدرم ده راست گلسيدى، ووره‌جقدم.“