اون يدنجى إشارت: رسولِ أكرم عليه الصلاة والسلامڭ قرآندن صوڭره أڭ بيوك معجزه‌سى، كندى ذاتيدر. يعنى اونده إجتماع ايتمش أخلاقِ عاليه‌در كه؛ هر بر خصلتده أڭ يوكسك طبقه‌ده اولديغنه، دوست و دشمن إتّفاق ايدييورلر. حتّى شجاعت قهرمانى حضرتِ على، مكرّرًا دييوردى: ”حربڭ دهشتلنديگى وقت، بز رسولِ أكرم عليه الصلاة والسلامڭ آرقه‌سنه إلتجا ايدوب تحصّن ايدييوردق.“ و هكذا... بتون أخلاقِ حميده‌ده أڭ يوكسك و يتيشيلميه‌جك بر درجه‌يه مالك ايدى. شو معجزۀِ أكبرى، علاّمۀِ مغرب قاضى عِياضڭ شفاءِ شريفنه حواله ايدييورز. الحقّ او ذات، او معجزۀِ أخلاقِ حميده‌يى پك گوزل بيان ايدوب إثبات ايتمشدر.

هم پك بيوك و دوست و دشمنله مصدّق بر معجزۀِ أحمديه (ع‌ص‌م) شريعتِ كبراسيدر كه، نه مِثلى گلمش و نه ده گله‌جك. شو معجزۀِ أعظمڭ بر درجه بياننى، بتون يازديغمز اوتوز اوچ سوز و اوتوز اوچ مكتوبه و اوتوز بر لمعه‌يه و اون اوچ شعاعه حواله ايدييورز.

هم رسولِ أكرم عليه الصلاة والسلامڭ متواتر و قطعى بر معجزۀِ كبراسى، شقِّ قمردر. أوت شو إنشقاقِ قمر؛ چوق طريقلرله متواتر بر صورتده، ابن مسعود، ابن عبّاس، ابن عُمَر، إمامِ على، أنس، حذيفه گبى پك چوق أعاظمِ صحابه‌دن متعدّد طريقلرله خبر ويريلمكله برابر، نصِّ قرآنله {اِقْتَرَبَتِ السَّاعَةُ وَ انْشَقَّ الْقَمَرُ} آيتى، او معجزۀِ كبرايى عالمه إعلان ايتمشدر. او زمانڭ عنادجى قُريش مشركلرى، شو آيتڭ ويرديگى خبره قارشى إنكار ايله مقابله ايتمه‌مشلر، بلكه يالڭز ”سحردر“ ديمشلر. ديمك كافرلرجه دخى قمرڭ إنشقاقى قطعيدر. شو معجزۀِ كبرايى، شقِّ قمره دائر يازديغمز اوتوز برنجى سوزه ذيل اولان شقِّ قمر رساله‌سنه حواله ايدرز.