مكتوبات | يگرمى اوچنجى مكتوب | 395
(395-402)
يگرمى اوچنجى مكتوب

بِاسْمِهِ سُبْحَانَهُ ❊ وَ اِنْ مِنْ شَيْءٍ اِلاَّ يُسَبِّحُ بِحَمْدِهِ

اَلسَّلاَمُ عَلَيْكُمْ وَ رَحْمَةُ اﷲِ وَ بَرَكَاتُهُ اَبَدًا بِعَدَدِ عَاشِرَاتِ دَقَائِقِ عُمْرِكَ وَ ذَرَّاتِ وُجُودِكَ

عزيز، غيرتلى، جدّى، حقيقتلى، خالص، درايتلى قارداشم!


بزم گبى حقيقت و آخرت قارداشلرڭ، إختلافِ زمان و مكان صحبتلرينه و اُنسيتلرينه بر مانع تشكيل ايتمز. برى شرقده، برى غربده، برى ماضيده، برى مستقبلده، برى دنياده، برى آخرتده اولسه ده برابر صاييلابيليرلر و صحبت ايده‌بيليرلر. خصوصًا بر تك مقصد ايچون بر تك وظيفه‌ده بولونانلر، بربرينڭ عينى حكمنده‌درلر. سزى هر صباح يانمده تصوّر ايدوب، قزانجمڭ بر قسمنى، بر ثلثنى (اﷲ قبول ايتسين) سزه ويرييورم. دعاده، عبد المجيد و عبد الرحمن ايله برابرسڭز. إن شاء اﷲ هر وقت حصّه‌ڭزى آليرسڭز. سزڭ دنياجه بعض مشكلاتڭز، سنڭ حسابڭه بنى بر پارچه متأثّر ايتدى. فقط مادام دنيا باقى دگل و مصيبتلرنده بر نوع خير واردر؛ سنڭ بدلڭه ”ياهو بو ده گچر“ قلبمه گلدى. {لاَ عَيْشَ اِلاَّ عَيْشُ اْلاٰخِرَةِ} دوشوندم، {اِنَّ اﷲَ مَعَ الصَّابِرِينَ} اوقودم، {اِنَّا ِﷲِ وَ اِنَّا اِلَيْهِ رَاجِعُونَ} ديدم. سنڭ يريڭه تسلّى بولدم. جنابِ حق بر عبدينى سَورسه، دنيايى اوڭا كوسدورر، چركين گوسترر. إن شاء اﷲ سن ده او سَوْگيليلرڭ صنفندنسڭ. ”سوزلر“ڭ نشرينه مانعلرڭ چوغالمه‌سى سزى متأثّر ايتمه‌سين. إن شاء اﷲ نشر ايتديگڭ مقدار بر رحمته مظهر اولديغى زمان، پك بركتلى بر صورتده او نورلى چكردكلر، كثرتلى چيچكلر آچاجقلر.

سس يوق

مكتوبات