مكتوبات | يگرمى اوچنجى مكتوب | 397
(395-402)

ايكنجى سؤالڭز: صحابۀِ كرام حضراتنه رضى اﷲ عنه دينيلديگنه بناءً، باشقه‌لره ده بو معناده سويله‌مك موافق ميدر؟


الجواب: أوت دينيلير. چونكه رسولِ أكرمڭ بر شعارى اولان عليه الصلاة والسلام كلامى گبى رضى اﷲ عنه تركيبى، صحابه‌يه مخصوص بر شعار دگل، بلكه صحابه گبى وراثتِ نبوّت دينيلن ولايتِ كبراده بولونان و مقامِ رضايه يتيشن أئمّۀِ أربعه، شاهِ گيلانى، إمامِ ربّانى، إمامِ غزالى گبى ذاتلره دينيلملى. فقط عُرفِ علماده صحابه‌يه، رضى اﷲ عنه؛ تابعين و تبعِ تابعينه، رحمه اﷲ؛ اونلردن صوڭره‌كيلره، غَفَرَهُ اﷲ؛ و أوليايه، قُدِّسَ سِرُّهُ دينيلير.


اوچنجى سؤالڭز: باشده مجتهدينِ عظام إماملرى مى أفضل، يوقسه حق طريقتلرڭ شاهلرى، أقطابلرى مى أفضلدر؟


الجواب: عموم مجتهدين دگل؛ بلكه أبو حنيفه، مالك، شافعى، أحمد ابن حنبل؛ شاهلرڭ، أقطابلرڭ فوقنده‌درلر. فقط خصوصى فضيلتلرده شاهِ گيلانى گبى بعض خارقه قطبلر، بر جهتده داها پارلاق مقامه صاحبدرلر. فقط كلّى فضيلت إماملرڭدر. هم طريقت شاهلرينڭ بر قسمى، مجتهدلردندر؛ اونڭ ايچون عموم مجتهدين، أقطابدن داها أفضلدر دينيلمز. فقط أئمّۀِ أربعه، صحابه‌دن و مهديدن صوڭره أڭ أفضللردر دينيلير.

سس يوق

مكتوبات