مكتوبات | يگرمى اوچنجى مكتوب | 400
(395-402)

امّا عمرِ سعادتنڭ آلتمش اوچ اولماسى ايسه، چوق حكمتلرندن بريسى شودر كه: شرعًا أهلِ ايمان، رسولِ أكرم عليه الصلاة والسلامى غايت درجه‌ده سومك و حرمت ايتمك و هيچ بر شيئندن نفرت ايتمه‌مك و هر حالنى گوزل گورمكله مكلّف اولديغندن؛ آلتمشدن صوڭره‌كى مشقّتلى و مصيبتلى اولان إختيارلق زماننده، حبيبِ أكرمنى بيراقمييور؛ بلكه إمام اولديغى اُمّتڭ عمرِ غالبى اولان آلتمش اوچده ملأِ أعلايه گوندرييور، ياننه آلييور؛ هر جهتده إمام اولديغنى گوسترييور.


يدنجى سؤالڭز


{خَيْرُ شَبَابِكُمْ مَنْ تَشَبَّهَ بِكُهُولِكُمْ وَ شَرُّ كُهُولِكُمْ مَنْ تَشَبَّهَ بِشَبَابِكُمْ}


حديث ميدر؛ بوندن مراد نه‌در؟


الجواب: حديث اولارق ايشيتمشم. مراد ده شودر كه: ”أڭ خيرلى گنج اودر كه؛ إختيار گبى ئولومى دوشونوب آخرتنه چاليشه‌رق، گنجلك هوساتنه أسير اولمايوب غفلتده بوغولمياندر. و إختيارلريڭزڭ أڭ كوتوسى اودر كه؛ غفلتده و هوساتده گنجلره بڭزه‌مك ايستر؛ چوجقجه‌سنه هوساتِ نفسانيه‌يه تابع اولور.“


سنڭ لوحه‌ڭده گورديگڭ ايكنجى پارچه‌نڭ صحيح صورتى شودر كه؛ بن باشمڭ اوستنده اونى بر لوحۀِ حكمت اولارق تعليق ايتمشم. هر صباح و آقشام اوڭا باقارم، درسمى آليرم:


سس يوق

مكتوبات